KRAAIFONTEIN IS GLO LANKAL OORLOGSONE

KRAAIFONTEIN is in rou gedompel nadat ses mense Dinsdag in 'n golf van geweld in net minder as 'n uur doodgeskiet is.

- KHIRSTEN BOOYS

Nóg 'n jong man wat in die kop geskiet is, sterk in die hospitaal aan.

In die eerste voorval wat om en by 21:50 in Eikendal plaasgevind het, is twee jong mans, Marquin Onkel (22) en Zhandre Jansen (20), afgemaai.

Dié skietery het op die hoek van Neënde Laan en Versterstraat plaasgevind, het sers. Wesley Twigg, 'n polisiewoordvoerder, bevestig.

'n Inwoner van die Lane vertel Onkel het glo vir Jansen halfpad geneem toe hulle geskiet is. Na verneem word, is albei mans in die kop geskiet.

Albei is dood verklaar op die toneel, wat nie ver van Onkel se ouerhuis is nie. Die polisie was nog besig op die toneel, toe hulle hoor van nog 'n dodelike skietvoorval in Molefestraat in Wallacedene.

In dié voorval is twee vroue se jong lewe kortgeknip. Hulle dood het sowat 40 minute ná die van Onkel en Jansen gevolg.

In die tweede voorval is 'n 19-jarige en haar 25-jarige vriendin doodgeskiet.

Die derde slagoffer (22) is gewond en na 'n hospitaal geneem.