Angela betree die preekstoel en chaos bars los in die kerk

Dis Sondag 'n paar maande ná die fight in die ouetehuis. Die gemeente van die VGK Dawidshoogte het almal reeds hulle sitplekke ingeneem in afwagting van die erediens. Edison en Maya is ook in die kerk.

- 

Die jeugkoor wieg lekker heen en weer terwyl hulle besig is met hulle praise and worship. Dan is daar 'n vrou wat skielik die preekstoel bestyg. Sy's in swart geklee. Met 'n handsein beveel sy die koor om stil te bly.

Dis Angela. Sy dra 'n swart hoed. 'n Net hang oor haar gesig.

Dan trek sy weg: "Gemeente - broers en susters - ek weet julle het nie verwag om my vanoggend hier op die preekstoel te sien nie.

"Maar daar's iets wat ek met julle moet deel. Iets wat ek van my hart af moet kry. 'n Belydenis.

Tot in hul fondament geruk

"Ek gaan nie nog doekies omdraai nie.

"Gemeente, dis 'n moeilike een, hierdie. 'n Paar maande gelede het ek by iets betrokke geraak. Iets waaroor ek tot vandag toe spyt is.

"Ek het ... wel in 'n oomblik van swakheid vir al die kamma mooi beloftes van 'n sekere man geval. Nou, luister mooi ... hierdie is nie sommer enige man nie. Hy's getroud."

Die skokkende nuus ontketen 'n kortstondige chaos en oproer onder die gemeente. Almal kyk grootoog met monde wat oophang na Angela in afwagting van wat gaan volg.

"Geliefde broers en susters, dié man het my die maan en sterre belowe en ek ... omdat ek in die liefde glo, het ek natuurlik daarvoor geval.

"Vandag erken ek, ek was 'n dwaas. Hy't my soos 'n vloerlap weggesmyt toe ek ... toe ek hom vertel ek's swanger met sy kind," lieg Angela vir die gemeente. Die gemeente is tot in hulle fondament geruk.

"Hierdie kind is verwek op die aand van my verjaardagpartytjie, liewe broers en susters. Terwyl sy vrou uitstedig was.

"Broers en susters, hierdie man is glad nie onbekend aan julle nie. In fact, hy's een van ons lidmate."

"Wie's hy, Angela? Wie's hy? Sê ons!" roep suster Nesie, nog 'n groot skinderbek, uit.

Haar man, oom Boet, stamp haar liggies aan die arm en beduie sy moet stilbly.