'N KAM, 'N SKER EN TOEWYDING

'Brooklyn Barbie' (24) bou aan sy gemeenskap en aan homself

- KHIRSTEN BOOYS

"JOU kind is my kind." In die hartjie van Macassar in Kaapstad waar gemeenskapshulpbronne skaars is, het 'n 24-jarige jongman 'n inisiatief begin wat besig is om die lewe van talle kinders te verander - alles met 'n kam, 'n skêr en 'n onwrikbare toewyding aan sy gemeenskap.

Levin Adams, beter bekend as "Brooklyn Barbie", staan elke tweede Vrydag in sy ma se voorhuis gereed en omring deur glimlaggende kinders wat wag vir 'n haircut, 'n vlegsel of net 'n bietjie aandag en sorg wat hulle dalk andersins nie sou kry nie.

"Ek het 'n hart vir kinders," sê Adams. Dit was soos 'n saadjie wat lank terug gesaai is, en die boompie nou eers begin groei."

Hy vertel die inisiatief het vyf maande gelede op 'n onverwagte manier begin. Hy en sy vriende het oor hulle kinderjare gesels, oor hoe hulle popphuisie gespeel het, toe hulle kinders met "wilde" hare sien verbyloop.

"Baie mense sê goed vandag en dan doen hulle dit nie môre nie,” vertel Adams. “Ek het vir my vriende gesê, kom ons begin môre kinders se hare in die gemeenskap versorg.”

Adams het video's van die inisiatief op sy sosiale media geplaas en binne vyf maande het dit gegroei tot 'n gemeenskapsprojek wat tientalle kinders help om selfvertroue te bou deur goed te lyk en spesiaal te voel.