Ethan word by die skool én huis met insults toegegooi

IT is Vrydagoggend skuins ná sesuur en ontbyt word in die Bloemhuishouding geëet.

- 

Ma Gretha, manlief Louis en hulle agjarige seun, Dean, het reeds hulle plekke by die ontbyttafel ingeneem.

Voor die gesin aan hulle ontbyt begin weglê, wag hulle ouder gewoonte, veral weeksoggende, op Ethan om by hulle aan te sluit.

Gretha en Louis is Dean se biologiese ouers.

Gretha was twee maande swanger met Ethan toe sy en Ethan se biologiese pa, Wouter Bredenkamp, se paadjies geskei het. Hulle was nooit getroud nie.

Ethan was maar twee jaar oud toe sy ma met Louis getrou het.

Sedert kleintyd is Louis konstant op Ethan se case.

Hy behandel die kind asof hy 'n nobody is, terwyl hy Dean skaamteloos voortrek.

In Louis se oë kan Ethan nooit iets reg doen nie.

Hy maak sy eie reëls

Omdat Ethan oorgewig is, word hy gereeld geboelie. Om dié rede sloer hy soggens wanneer hy gereed moet maak vir skool.

By die skool word hy al wat lelike naam is, toegesnou: outcast, weirdo, vettie boem-boem, vetsak, potjierol ...

"Jy lyk soos iemand wat 'n rubberboot ingesluk het," het 'n onnie by sy skool op 'n dag na hom in die teenwoordigheid van ander kinders verwys.

Omstreeks 06:20 besluit Ethan om uiteindelik sy verskyning by die ontbyttafel te maak.

Louis kyk hom vies aan terwyl hy sy stoel traag van onder die tafel uittrek.

"Is dit die tyd om hier aan te kom? Waar het jy so lank gedraai? Jy weet ons eet breakfast soggens stiptelik om ses-uur. Moenie probeer kanse vat nie. Onthou, jy's glad nie te oud vir 'n pak slae nie, hoor jy my?"

'n Senuweeagtige Gretha probeer die situasie red: "Ag, Louis, los die kind. Hy't seker maar net sleg geslaap of iets ..."

"Hy doen dit elke oggend, Gretha. Hy toon geen respek nie. Dis onaanvaarbaar! Daar's 'n reël in hierdie huis dat almal soggens stiptelik om sesuur aan tafel moet wees voordat daar enigsins aan kos geraak word.