HAAR VLEES KRY GEES NIE ONDER

Jong dosent (23) se passie vir wiskunde nie deur siekte gestuit

- KHIRSTEN BOOYS

DIE jong wiskunde-dosent se verhaal begin as 'n 13-jarige wat hoofpyne ervaar en eindig met 'n inspirerende opvoeder wat die lewe van honderde studente aanraak.

Jaydee Martin (23) van Kleinmond, 'n klein kusdorpie in die Overberg-streek, vertel dit was in Julie 2015 dat sy die eerste tekens van die hoofpyne begin ervaar het.

"Ek het gedink dit is omdat ek altyd besig was met skoolwerk," onthou sy. Sy was toe in graad 7.

Dokter ná dokter het dieselfde advies gegee: meer rus, minder besig wees.

Maar die hoofpyne het erger geword - sensitiewe gehoor, verblindende sig, swakheid in die lyf. Simptome wat dokters as muscle stiffness afgemaak het.

Tot op 'n dag in Augustus toe sy tydens 'n toets blank geslaan het, haar geheue verloor en bewusteloos geword het.

Sy brei uit: "Die MRI-skandering ná 'n byna fatale allergiese reaksie op jodium het die waarheid geopenbaar: 'n 1 cm-breingewas by die temporale lob aan die linkerkant van my brein."

Nagevolge

"Toe my pa gesê het hulle moet my brein opereer, was ek geskok," vertel sy.