CAPEXIT WORD DIE EXIT GEWYS

DAAR was gister groot drama in die Civic Centre toe 'n raadslid van die Cape Independence (CAPEXIT)-party, Jack Miller, uit die raadsvergadering gesmyt is.

- ANELE MFAZWE

Miller is die leier van dié party, wat aanvoer dat die Wes-Kaap van die res van Suid-Afrika moet wegbreek en op sy eie as 'n onafhanklike land staan.

Gister se raadsvergadering is ontwrig nadat Miller na almal wat van die Oos-Kaap afkomstig is, as arbeidsmigrante verwys het.

Sekuriteitswagte is ontbied om Miller uit te gooi nadat hy geweier het om sy uitlatings terug te trek.

Ndithini Tyhido, die opposisieleier, het al die raadslede teenwoordig in die vergadering geloof dat hulle almal saamgestaan het, ongeag hulle partye, en Miller se uitlatings verwerp het.