வரலாற்றை மாற்றவும் மறைக்கவும் முயலவேண்டாம்

மனிதனின் வாக்கான தீர்ப்புகள் கூட திருத்தப்படலாம். வாழ்க்கை ஆன வரலாறு திருத்தப்பட முடியாது. ஏனெனில், நிகழப் போகவை மாறலாம். நிகழ்ந்ததை மாறா. இந்தியாவின் வரலாற்றை ஒரு குறிப்பிட்ட ஆழத்துக்கு கீழே தோண்டிப் பார்த்தால் அது தமிழகத்தின் வரலாறாக தமிழரின் வரலாறாக மிளிர்கிறது. கற்கால முதல் தற்காலம் வரை தமிழர்கள் பண்பாட்டுத் தடயங்கள் இந்திய மண்ணிலே எங்கணும் பரவிக் கிடக்கின்றன.

- 

அவ்வாறே தமிழரின் பண்டைய வரலாற்றை அறிய அறிய பொக்கிஷமாக அமைந்தது கீழடி அகழ்வாய்வின் எச்சங்கள். கீழடியை தோண்ட தோண்ட கீழ் அடியில் தமிழர்களின் வாழ்வு பல நூற்றாண்டு காலம் பின்னோக்கிப் போனது. இதனால் வட இந்திய வரலாற்று ஆய்வாளர்கள் திகைத்தனர். ஆரியத்திலிருந்து தமிழ், ஆரியர்களுக்கு பின் தமிழர்கள் என்ற பஞ்சாங்க வாதம் பஞ்சாய் பறந்தது. இந்நிலையில் தான் கீழடியின் முதல் இரண்டு கட்ட அகழாய்வு ஆய்வறிக்கையை இந்திய தொல்லியல் துறை இதுவரை வெளியிடாத சூழலில், திடீரென ஆய்வறிக்கையை திருத்தி எழுத உத்தரவு பிறப்பித்திருத்தது சர்ச்சையை கிளப்பியது.

கீழடியில் கடந்த 2014ஆம் ஆண்டு முதல் அகழாய்வுப் பணிகள் நடைபெற்று வருகின்றன. பத்தாவது கட்டம் வரை ஆய்வு தொடர்ந்து வருகிறது. ஆனாலும் இதுவரை அதன் அறிக்கை சமர்ப்பிக்கப்படாதது பலத்த சந்தேகத்தை எழுப்பிய நிலையில், இப்போது அதை திருத்த சொல்லியிருப்பது மேலும் ஐயப்பாட்டை ஏற்படுத்துகிறது.