KAKULANGAN NG EBIDENSYA, 'DI SAPAT GAWING BATAYAN

ANG aming ibabahagi sa araw na ito ay isang kasong hawak ng aming Tanggapan, ang People of the Philippines vs. James Montino y Nava alias "Idol" and Arjie Montino y Nava alias "Estong" (CA-G.R. CR HČ No. 04128), sa panulat ni Honorable Associate Justice Rogelio G Largo ng Special Eighteenth Division ng Court of Appeals.

- 

Ito ay tungkol sa kasong murder na paglabag sa Artikulo 248 ng ating Revised Penal Code at kalaunang pagpapawalang-sala sa mga inakusahan dahil sa kakulangan ng ebidensya ng tagausig kaugnay sa kaduda-dudang pagkilala sa mga akusado na sina James at Arjie bilang mga may-akda ng krimen.

Binigyang-diin sa kasong ito ang kahalagahan ng malinaw na pagtukoy sa may-akda ng krimen na bagaman mapatunayan ng tagausig ang lahat ng elemento ng krimen ay hindi pa rin ito makapagbaba ng hatol na pagkakasala laban sa akusado; gayundin na mahalagang mapatunayan ang kredibilidad ng mga saksi kaugnay hindi lamang sa pagtukoy o pagkilala sa akusado kundi pati na rin ang mga pangyayari na may kinalaman sa komisyon ng krimen upang hindi paboran ng korte ang depensa ng sinasakdal na alibi o pagdadahilan. Ang motibo sa paggawa ng krimen ay mahalaga rin kung may pagdududa sa pagkakakilanlan ng taong may-akda sa krimen.

Kaya naman, kung merong kaunting pagdududa hinggil sa pagkakasalang akusado, ang Korte ay hahatol ng pagpapalaya.

Napakahalaga ng papel ng Tanggapan ng Manananggol Pambayan upang ipaglaban ang karapatan ng mga naaapi at napagbibintangan lamang.

Ang marubdob na daing sa kauhawan ng hustisya ay napawi nang ito ay mapagtagumpayan pabor sa mga inakusahan.

Batay sa bersyon ng panig ng tagausig, noong ika-24 ng Disyembre 2018, bandang alas-4:00 ng hapon, si Levy, kasama ang kanyang katulong na si Jesus "Jessie" dela Cruz, ay nagmaneho ng Canter truck na nakatalaga sa kanya patungo sa Sitio Najaba, Barangay Bacong, Lungsod ng Bago, upang hakutin ang mga piraso ng kahoy na nauna nang binili ng kanyang among si Kagawad Suarez sa nasabing lugar.

Dumating sina Levy at Jessie sa Sitio Najaba alas-5:30 ng hapon at ipinarada ang truck sa gilid ng kalsada, kung saan nakasalansan ang mga piraso ng kahoy. Doon ay hinintay nila si July Orbita upang sila'y tulungan sa pagkakarga ng kahoy sa truck.