“సంస్కృతి పరిరక్షణ మరియు శాస్త్రీయ దృక్పథం - విద్యారంగం పాత్ర"

“సంస్కృతి పరిరక్షణ మరియు శాస్త్రీయ దృక్పథం - విద్యారంగం పాత్ర"

- అసోక్ గుంటక . -9908144099

1. సంస్కృతి పరిరక్షణ%-%ఆధునికతతో సమతుల్యత :: సంస్కృతి పరిరక్షణ పేరుతో, పట్టణాలు గ్రామాలు మారుమూల ప్రాంతాలలోని, కొన్ని సముదాయాలని, ఎలా ఉండే వారిని అలాగే ఉండనివ్వడం అనే విషయం గూర్చి, అది వారి సంస్కృతిని గౌరవించడమా, కాపాడాలని అనుకోవడమా లేదంటే ఈ పేరుతో వారిని నాగరికతకు లేదా ఆధునిక అవకాశాలకు దూరం చేసి వంచన చేయడమా, అనే చర్చ నడుస్తూనే ఉంది. ఈ చర్చ అన్ని సముదాయాలకు అంటే గ్రామీణ రైతు తదితర వృత్తి ఆధారిత సముదాయాలకు, వివిధ కులాలు లేదా మతాలు అన్నింటికీ వర్తిస్తుంది. ఎందుకంటే సంప్రదాయాలను ఉన్నది ఉన్నట్టు స్థిరంగా ఉంచడం వల్ల అవి అభివృద్ధి అవకాశాలను అడ్డుకోవచ్చు. లేదంటే సమకాలీన సవాళ్లతో సమన్వయం చేసుకుంటే ముందుకు కొనసాగవచ్చు. ఈ రకమైన సమతుల్యత లేకుండా, సంస్కృతి సంప్రదాయాల పరిరక్షణ అనేది ఒక రకమైన సామాజిక వంచనగా మారవచ్చు లేదంటే ఇది వ్యక్తులు మరియు సముదాయాల అభివృద్ధిని పరిమితం కూడా చేయవచ్చు.

2. భారతీయ సంస్కృతి - గతిశీల వ్యవస్థ :: ఈ దేశ సంస్కృతి వేల సంవత్సరాలుగా సజీవమైన ఒక గతిశీల వ్యవస్థ. ఇది స్థిరమై ఉ న్నది కాదు అంటే తప్పేమీ లేదు. నిజానికి మార్పులకు అవకాశం ఇచ్చే ఉదారత వల్లనే ఇది ఇంతకాలం కొనసాగుతూ ఉంది. వేదాలు, పురాణాలు నుండి ఉపనిషత్తులు వరకు ప్రశ్నించడం, చర్చలు, జైనిజం, బౌద్ధము వంటి భిన్న మార్గాల కలబోతయే ఇక్కడి సంస్కృతి. వీటి ద్వారా వచ్చిన ఏ మార్పులు లేకుండా ఉంటే, భారతీయ ధర్మాచరణ ఒక రకమైన కల్ట్ పద్ధతిగా మిగిలిపోయేది కావచ్చు. అయితే, ఈ సంస్కృతి పరిరక్షణ అనేది నిజానికి అన్ని సముదాయాలకు వర్తించే విషయం. అందుకని అందరినీ కలుపుకుని వెళ్లాలి. వారి వారి స్వంత ఆచారాలను సంప్రదాయాలను గౌరవించడం జరగాలి అదేసమయంలో ఆధునికతతో సమన్వయం చేసుకోవడం కూడా జరగాలి. ఇటువంటి సమతుల్యత లేకుండా, సంస్కృతి పరిరక్షణ పేరుతో ఆధునిక ప్రపంచానికి దూరంగా ఉండడం లేదా ఉంచడం వంచనగా మారవచ్చు. విశ్లేషణాత్మకంగా చూస్తే, ఈ చర్చ సముదాయాల మధ్య సామాజిక అసమానతలను కూడా పెంచవచ్చు. ఎందుకంటే కొన్ని సముదాయాలు సంప్రదాయాల పేరుతో ఆధునిక విద్య, ఆరోగ్యం, ఉపాధి అవకాశాల నుండి దూరమవుతాయి, మరికొన్ని మాత్రమే ముందుకు సాగుతాయి.