തിരമലയാളത്തിലെ ‘ചിറകൊടിഞ്ഞ പൈങ്കിളികൾ

‘പൈങ്കിളി’ സാഹിത്യത്തെ മലയാള സിനിമ പലവിധത്തിൽ പരിഹസിക്കുകയും ആക്രമിക്കുകയും ചെയ്തിട്ടുണ്ട്. പൈങ്കിളി മോശമാണെന്ന് ആക്ഷേപിക്കുന്ന സിനിമകളും സീരിയലുകളും സമാനമായ ‘പൈങ്കിളി’തന്നെയാണ് വിളമ്പുന്നത് എന്ന മറ്റൊരു വിമർശനവുമുണ്ട്. മലയാള സിനിമ ‘ജനപ്രിയ’ സാഹിത്യത്തെ എങ്ങനെയാണ് കൈകാര്യം ചെയ്തത് എന്ന് പരിശോധിക്കുകയാണ് സിനിമാ നിരൂപകനും ഗവേഷകനുമായ ലേഖകൻ. പണ്ഡിത ന്യൂനപക്ഷത്തിന്റെ വരേണ്യയുക്തികളാണോ പൈങ്കിളി പരിഹാസത്തിനു കാരണം ? -ഒരു സംവാദത്തിന് തിരികൊളുത്തുകയാണ് ഈ പഠനം.

- ബ്ലെയ്സ് ജോണി

സംസ്കാരപഠനമെന്ന് അക്കാദമിക പഠനശാഖയുടെ വികാസത്തിനു ശേഷം സജീവമായ ചർച്ചകൾക്ക് വിധേയമായ പരികൽപനകളിലൊന്നാണ് ജനപ്രിയത. സംസ്കാരത്തെ സംബന്ധിച്ച് നിലനിന്നിരുന്ന വ്യവഹാര മാതൃകകളെല്ലാം ഇക്കാലയളവിൽ പ്രശ്നവത്കരിക്കപ്പെടുകയും പുനർവിചിന്തനത്തിന് വിധേയമാകുകയും ചെയ്തിട്ടുണ്ട്. അതിനാൽ തന്നെ, സംസ്കാരപഠനത്തിന്റെ നോക്കുപാടിൽ വികസിച്ച ചലച്ചിത്രനിരൂപണവും ചലച്ചിത്രപഠനവും ജനപ്രിയ സിനിമകളെക്കൂടി അഭിസംബോധന ചെയ്യുന്നവയാണ്. കലാസിനിമകളെന്ന് വിശേഷിപ്പിക്കപ്പെടുന്ന ചിത്രങ്ങളിൽ മാത്രമൊതുങ്ങിയിരുന്ന മലയാളത്തിലെ ചലച്ചിത്ര നിരൂപണ പദ്ധതി, ജന സാമാന്യത്തിന്റെ അഭിരുചികളെക്കൂ ടി പരിഗണനാവിഷയമായി അംഗീകരിക്കുന്നത് സംസ്കാരപഠനത്തിന്റെ ആവിർഭാവത്തോടുകൂടിയാണ്. ജനപ്രിയ സംസ്കാരപഠനത്തിൽ വന്നുചേർന്നിട്ടുള്ള പ്രത്യയശാസ്ത്ര  വിമർശനമാതൃക മാർക്സിസ്റ്റ് വിമർശനത്തിന്റെ സ്വാധീനത്തിലാണ് രൂപമെടുത്തിട്ടുള്ളത്. കൂടാതെ, സാമൂഹികസാംസ്കാരിക ബന്ധങ്ങളിൽ അന്തർലീനമായിരിക്കുന്ന ജാത്യധികാര സൂചനകൾ ഇഴപിരിച്ചെടുത്ത് പരിശോധിക്കുന്നതിൽ കീഴാള സംസ്കാര പഠനവും (Subaltern Cultural Studies) സക്രിയമായി ഇടപെട്ടിട്ടുണ്ട്. മറ്റൊരർഥത്തിൽ, വിശാലമായ ഇടതുപക്ഷ പ്രത്യയശാസ്ത്രനിരൂപണത്തിന്റെ സ്വാധീനം സിനിമയടക്കമുള്ള സാംസ്കാരികോൽപന്നങ്ങളുടെ വിമർശനാത്മകമായ വിശകലനത്തിൽ പങ്കു വഹിക്കുന്നു.