பாலாசாகித்ய புரஸ்கார், யுவ புரஸ்கார்! விருது வென்ற இரு படைப்பாளிகள்!

2025-ஆம் ஆண்டுக்கான 'பால சாகித்ய புரஸ்கார் விருது', 'ஒற்றைச் சிறகு ஓவியா' என்ற நாவலுக்காக எழுத்தாளர் விஷ்ணுபுரம் சரவணனுக்கு அறிவிக்கப்பட்டுள்ளது.

- -தெ.சு.கவுதமன்

அதே போல், கூத்தொன்று கூடிற்று & பிற கதைகள் என்ற சிறுகதைத் தொகுப்புக்காக எழுத்தாளர் லட்சுமிஹருக்கு 'யுவ புரஸ்கார் விருது' அறிவிக்கப்பட்டுள்ளது.

பத்திரிகையாளர், எழுத்தாளர், சிறுவர்களுக்கான கதை சொல்லி எனப் பன்முகத்தன்மை கொண்ட விஷ்ணுபுரம் சரவணன், தமிழ்நாடு பள்ளிக்கல்வித் துறையின் சார்பாக வெளிவரக் கூடிய ஊஞ்சல், தேன்சிட்டு, கனவு ஆசிரியர் ஆகிய இதழ்களிலும், வெளியீடுகளிலும் சிறப்பான பங்களிப்பை அளித்துவருகிறார். விஷ்ணுபுரம் சரவணன், தனக்கு கிடைத்துள்ள விருது, தனது சிறார் இலக்கிய எழுத்துப்பயணம் குறித்து கூறுகையில், "பொதுவாக சிறார் இலக்கியத்தை பெரும்பாலான இலக்கியக் கருத்தரங்கங்களில் பொருட்படுத்துவதில்லை. இப்படியான சூழலில் சிறார் இலக்கியத்திற்கு சின்னதாக பாராட்டோ, விருதோ கிடைக்கும்போது இத்துறையில் இயங்குபவர்களுக்கு ஊக்கத்தை கொடுக்கும். அந்த வகையில் இந்த விருதை நான் மகிழ்ச்சியோடு வரவேற்கிறேன்.

தொடக்கத்தில் கவிதைகளை எழுதிவந்த நான், 2010-ஆம் ஆண்டு முதல் சிறார் இலக்கியத்தில் கால் பதித்தேன். எங்கள் ஊரில் வேலு சரவணன் குழந்தைகளுக்கான நாடகம் போட்டார். அப்போது அவரோடிருந்து செயல்பட வாய்ப்பு கிடைத்தது. அந்த அனுபவம், குழந்தைகளுக்காக எழுதவும், செயல்படவும் உந்துதலாக இருந்தது. அதன் பின்னர் எழுத்தாளர் யூமா வாசுகியைச் சந்தித்த போது எழுதுவதற்கு முன்மாதிரியான நூல்கள், மலையாளம், ஆங்கிலத்திலிருந்து மொழிபெயர்க்கப்பட்ட நூல்களை எனக்கு வாசிக்கக் கொடுத்தார். அந்த நூல்களை வாசித்தபோது, குழந்தைகளுக்கான இலக்கியத்தில் எனக்கு ஆர்வம் ஏற்பட்டது.