આપણે તો પ્રવાસી પારાવારના ને પડકારના...

દિવસે ને દિવસે ચૅલેન્જિંગ બની રહેલા જીવનમાંથી ઘડીક છૂટવાનો હાથવગો ઉપાય છેઃ પ્રવાસ. જો કે વૅકેશનમાં બિસ્તરા-પોટલાં બાંધીને ભટકવા નીકળી પડવાના દિવસો હવે ગયા. ઈન્સ્ટાયુગમાં પ્રવાસને જીવનની ઉત્તમ ક્ષણો બનાવી દેવા અવનવા ટ્રેન્ડ જોવા મળી રહ્યા છે. હવે તો રહસ્ય-રોમાંચથી લઈને માત્ર ઊંઘવાની ટૂરો પણ નીકળી છે. ચાલો, ‘ચિત્રલેખા’ની સંગાથે ટ્રાવેલના કેટલાક નવીનવાઈના ટ્રેન્ડની સફર પર.

- ઉમંગ વોરા (મુંબઈ)

“શું વાત કરો છો? ધખધખતો જ્વાળામુખી જોવાની ટૂરનું પ્લાનિંગ કરી રહ્યા છો?’

‘હા.’ ‘હેં?! જ્વાળામુખી ફાટે ત્યારે તો આસપાસના કિલોમીટરો સુધીના ગામવાસીઓ પોટલાં બાંધી નાસદોટ કરી મૂકે અને તમે કહો છો, સેંકડો કિલોમીટરો દૂરથી ઘેલા પ્રવાસીઓ એ જ્વાળામુખી જોવા દોટ મૂકે છે?’

‘હા. યસ. વાય ઈ એસ... યસ.'

વાચકમિત્રો, આ છે એક્સ્ટ્રીમ ટૂરિઝમ. આત્યંતિક પર્યટન. જોખમનો આનંદ માણવાની યાત્રા. આ જ નહીં, આવા અનેક ટ્રાવેલ ટ્રેન્ડ અત્યારે બિલાડીના ટોપની જેમ ફૂટી નીકળ્યા છે. રોજ સવારે ઊઠીને મોબાઈલ ફોનમાં ઈન્સ્ટાગ્રામ ખોલો એટલે બે-ચાર નવજાત ટ્રેન્ડ જગતમાં અવતરી ચૂક્યા હોય છે.

દાખલા તરીકે, આજકાલ ઍરપોર્ટ થિયરી ચાલી છે. આમાં પ્રવાસીઓ ઍરપોર્ટ પર બે-ત્રણ કલાક વહેલા પહોંચી, સમયસર ચેક-ઈન કરાવી એય...ને નિરાંતે વિવિધ દુકાનો, રેસ્ટોરાંની લટાર મારવાને બદલે છેલ્લી ઘડીએ ઍરપોર્ટ પર આવે. આ છે ઍરપોર્ટ થિયરી. ફ્લાઈટ ગેટ બંધ થાય એના થોડા જ સમય પહેલાં ઘાંઘા થઈને આવવાનું, જરાય વાટ નહીં જોવાની, દોડાદોડી કરીને ફ્લાઈટ પકડવાની. ઘણા છેલ્લી ઘડીએ અમદાવાદના કાળુપર સ્ટેશને પહોંચીને ગુજરાત મેલ પકડે એમ. આવો ટ્રેન્ડ શરૂ કરનાર ભેજાગેપનું કહેવું છે કે આનાથી પ્રતીક્ષા ટળે છે અને પૈસાની બચત થાય છે. તો ઍવિયેશન એક્સ્પર્ટનું કહેવું છે કે આ કેવળ બાલિશ થિયરી છે. આમાં ફ્લાઈટ મિસ થવાનું તથા પેનલ્ટી ભરવાનું જોખમ છે. વળી, ઍરપોર્ટ સ્ટાફ પર એ પ્રેશર વધારી મૂકે છે. પ્રવાસીઓને એ રોમાંચક લાગે, પણ એ સ્ટ્રેસ વધારી મૂકે છે. ખેર, પણ શું થાય? આ તો લેટેસ્ટ ટ્રેન્ડ છે!

હશે. આપણે ફરવા જવામાં કેવાં કેવાં પરિવર્તન આવ્યાં એની વાત કરીએ છીએ. આજકાલ લોકો સ-દેહે પર્યટનસ્થળે પહોંચે એ પહેલાં ઈન્સ્ટાગ્રામ, ફેસબુક, યુટ્યૂબ જેવાં માધ્યમથી મનથી તો ત્યાં પહોંચી જ જાય છે. પરિણામે સામાન્ય પ્રવાસનસ્થળો, હરવાફરવાનાં ટ્રાવેલ ડેસ્ટિનેશન્સ, હેરિટેજ સ્થાનોનો લોકોમાં ખાસ રોમાંચ નથી રહ્યો. ખાસ કરીને યુવાનોમાં. ફરવા જવું અને રોમાંચ અનુભવીને ફરવા જવું એ બે જુદા પ્રવાસ-અનુભવ થઈ ગયા છે.