બાળકના જન્મ સાથે જ ખૂલી શકે પેન્શન પ્લાન એકાઉન્ટ

તમારા પરિવારમાં કે કોઈ સ્નેહીજનના બાળકને સારું ભવિષ્ય આપવા માગતા હો તો એના જન્મ સમયે ભેટ આપવા માટે ‘વાત્સલ્ય પેન્શન પ્લાન’નો વિચાર પણ કરજો.

- જયેશ ચિતલિયા

નાનાં બાળકોનાં નામે હવે પેન્શન એકાઉન્ટ ખૂલી શકશે...

આ શબ્દો વાંચીને નવાઈ લાગી? અલબત્ત, લાગી જ હશે, કારણ કે પેન્શન તો માણસને એની નિવૃત્તિવય પછી મળવાનું હોય. એ ફંડની રકમ પણ એ કામે લાગે ત્યારે એના પગારમાંથી કપાવાની શરૂઆત થાય. જો કે પેન્શન એકાઉન્ટ તો બાળક જન્મ લેશે ત્યારથી વડીલો એના નામે ખોલાવી શકશે. હા, આ એકાઉન્ટ કે આ યોજનાનું નામ છે એનપીએસ (નૅશનલ પેન્શન સિસ્ટમ) વાત્સલ્ય.

ભવિષ્યનો વિચાર કરીને જે પેરન્ટ્સ પોતાનાં સંતાનોનું ભવિષ્ય વધુ સુરક્ષિત કરવા માગતા હોય એમના માટે વાત્સલ્યને એક નવી ઉમ્મીદ અને તક બનીને આવેલી યોજના કહી શકાય.

એનપીએસનું નવું બાળસ્વરૂપ

એનપીએસ આપણા દેશમાં ઘણા સમયથી કાર્યરત છે અને ઘણેખરે અંશે સફળ પણ રહી છે. જો કે હજી એણે લાંબી મજલ કાપવાની છે. આપણા દેશમાં ચોક્કસ વિકસિત દેશોની જેમ સામાજિક સુરક્ષા (સોશિયલ સિક્યોરિટી)નું કોઈ સરકારી માળખું યા સુવિધા ઉપલબ્ધ નથી, માણસે પોતાની બચત-રોકાણને જ નિવૃત્ત જીવનનો આધાર બનાવવો પડે છે.