છોટા પૅક... બડા ધમાકા

સેબીએ હમણાં મ્યુચ્યુઅલ ફંડ કંપનીઓને ૨૫૦ રૂપિયા જેટલી નાની રકમના એસઆઈપી ઑફર કરવા અનુરોધ કર્યો છે. આમ તો ફંડ્સ માટે આ કામ મોંઘું પડવાની સમસ્યા છે, પરંતુ એનો ઉપાય પણ કરી શકાય છે.

- જયેશ ચિતલિયા

તમે શૅમ્પૂનો ઉપયોગ કરો છો? એની મોટી બૉટલ ખરીદો છો કે એનાં નાનાં નાનાં સેચે?

આ વિભાગમાં આવા સવાલથી નવાઈ લાગી શકે, પણ આ સવાલ પાછળનો તર્ક તમને મ્યુચ્યુઅલ ફંડના એસઆઈપી (સિસ્ટેમેટિક ઈન્વેસ્ટમેન્ટ પ્લાન) સુધી લઈ જશે. નવાઈ લાગી? હા? તો હવે સીધી અને સ્પષ્ટ વાત કરીએ...

વેચાણ વધારવા નાનાં પૅકિંગનો માર્ગ

સેબીનાં ચૅરપર્સન માધબી પુરી બૂચે હમણાં શૅમ્પૂના ઉદાહરણ સાથે એસઆઈપીની જે વાત કરી એ મ્યુચ્યુઅલ ફંડ ઉદ્યોગ અને રોકાણકાર વર્ગ બન્ને માટે ઉપયોગી છે. સેબીનું લક્ષ્ય નાની રકમના એસઆઈપીનો વ્યાપ વધારીને સાવ નાના બચતકારો-રોકાણકારોને મ્યુચ્યુઅલ ફંડ તરફ વાળવાનો છે. આ બાબતમાં શૅમ્પૂનું ઉદાહરણ આપીને સેબી કહે છે કે મ્યુચ્યુઅલ ફંડ કંપનીઓએ એફએમસીજી (ફાસ્ટ મૂવિંગ કન્ઝ્યુમર ગુડ્સ)નું અનુસરણ કરવા જેવું છે. આ સેક્ટરની ઘણી કંપની ગ્રાહકોને આકર્ષવા પોતાની પ્રોડક્ટ્સનાં અતિ નાનાં પૅકેટ્સ બજારમાં વેચે છે, જેથી એ નાના વર્ગ માટે એફોર્ડેબલ (પોસાય એવાં) બને.