ખબર હોવા છતાં બેખબર

માનવી ગુમરાહ છે, એવું નથી હું માનતો સાચો રસ્તો જાણે છે સૌ, ચાલતું કોઈ નથી

- હિતેન આનંદપરા

કેટલીય વાતો ખબર હોવા છતાં આપણે જાતને ખબરદાર કરી શકતા નથી. કારણ દીવા જેવાં સ્પષ્ટ છે. આદર્શ સાચવવા આપણું નુકસાન થતું હોય એ આપણને મંજૂર નથી હોતું. આપણી માનસિકતા ટૂંકા સમયમાં નફો મેળવી લેવાની છે. કર્મનો સિદ્ધાંત પુસ્તક વાંચ્યું હોય તોય એના હિસાબે ચાલવાની નોબત આવે ત્યારે દસ વાર વિચાર કરીએ.

પ્રત્યેક વ્યક્તિનું એક દાયિત્વ હોય છે-જાત પ્રત્યે અને જગત પ્રત્યે. નાનામાં નાનો જીવ પણ સૃષ્ટિની સાંકળનો એક હિસ્સો છે. એમાં સવાલ કદનો કે મદનો નથી, સવાલ ઉપયોગિતાનો છે. ઉપયોગિતાનાં બે પાસાં છે. કોઈ આપણને કેટલું કામ લાગે છે એ જેટલું મહત્ત્વનું છે એટલું જ મહત્ત્વનું તથ્ય છે કે આપણે કોઈને કેટલું કામ લાગીએ છીએ. ચિંતકો અને મહાપુરુષો અનુભવમાંથી જન્મેલાં સોનેરી સૂત્રો આપીને ગયા છે. આપણે વાંચ્યા વગર ફૉરવર્ડ કરીએ છીએ, અમલમાં મૂકતા નથી.