ઉમેદવારોની યાદીની સાથે જ કોંગ્રેસના બાર વાગી ગયા!

લોકસભા ચૂંટણીનો કાર્યક્રમ જાહેર થાય એ પહેલાં ભાજપે બીજાં કેટલાંક રાજ્યોની જેમ ગુજરાતની ૧૫ બેઠક માટે એના કોંગેસનાં નામ ઘોષિત કરી દીધાં, એની ચર્ચા પૂરી થાય એ પહેલાં તો કોંગ્રેસના ભૂતપૂર્વ પ્રદેશપ્રમુખ સહિત અન્ય આગેવાનોએ ભગવો ખેસ પહેરી લઈ ચૂંટણીનો માહોલ ગરમ કરી નાખ્યો.

- કેતન ત્રિવેદી (ગાંધીનગર)

હાલત એવી છે કે હવે કોંગ્રેસના કોઈ નેતા ભાજપમાં જોડાય એની કોઈને નવાઈ લાગતી નથી, આમ છતાં પ્રદેશ કોંગ્રેસના ભૂતપૂર્વ પ્રમુખ અર્જુન મોઢવાડિયા જેવા આગેવાન પણ કોંગ્રેસ છોડે ત્યારે ગુજરાતના રાજકારણમાં આંચકા અનુભવાય એ સ્વાભાવિક છે. અર્જુનભાઈની સાથે રાજુલાના ભૂતપૂર્વ ધારાસભ્ય અંબરીશ ડેરના ભાજપપ્રવેશ પછી ગુજરાત વિધાનસભામાં કોંગ્રેસની સંખ્યા ૧૭માંથી ઘટીને ૧૪ થઈ ગઈ છે. હજી બીજા કોંગ્રેસી ધારાસભ્યો કમલમના દરવાજે દસ્તક દેવા તૈયાર છે એ જોતાં કહી શકાય કે લોકસભાની ચૂંટણી ટાણે જ ભાજપે જનોઈવઢ ઘા કરીને કોંગ્રેસના બાર વગાડી દીધા છે!

 ભાજપનો આક્રમક મૂડ અને ગુજરાતની લોકસભાની તમામ-૨૬ બેઠક પાંચ લાખની સરસાઈથી જીતવાનું લક્ષ્ય જોતાં ચૂંટણી સુધીમાં હજી કેટલાક કોંગ્રેસી ધારાસભ્યો-અગ્રણીઓ ભાજપ સામે નમો નમો કરતાં આવે એવી શક્યતા છે.

આમ તો આમાં કંઈ નવું પણ નથી. ગુજરાતમાં (અને રાષ્ટ્રીય કક્ષાએ પણ) કોંગ્રેસની સ્થિતિ અત્યંત નબળી અને અંગ્રેજીમાં જેને વહ્નરે (Vulnerable) કહી શકાય એટલે કે જેના પર તમે આસાનીથી પ્રહાર કરી શકો એવી છે. પક્ષને જિતાડી શકે એવો નેતા નથી, કાર્યકરોનું નેટવર્ક નથી, પૈસા નથી અને ભવિષ્યની દિશા નથી. વળી, કોંગ્રેસમાં રહીને સરકારની દુશ્મની વહોરવાનું કોને પોસાય? આ સ્થિતિમાં સમય વેડફવા કરતાં સત્તાપક્ષ સાથે જવાનું સૌ પ્રસંદ કરે એટલે કોંગ્રેસનું નેતૃત્વ ધારે તો પણ ભાજપપ્રવેશની આ લહેર અટકાવી શકે એમ નથી.

આ બધાની વચ્ચે, ભાજપે ચૂંટણીની સત્તાવાર જાહેરાત પહેલાં જ ગુજરાતની ૧૫ બેઠક માટે ઉમેદવારોનાં નામ ઘોષિત કરી દીધાં છે. ગુજરાતમાં ભાજપ અત્યંત મજબૂત છે અને મોદીના નામે જ જીતવાની ગૅરન્ટી છે એટલે આમ તો ઉમેદવારોની પસંદગીમાં પક્ષ નો રિપીથી માંડીને કોઈ પણ નિર્ણય લઈ શકે એમ હતો, પરંતુ અમુક અપવાદ સિવાય ભાજપે નો રિપીટનું જોખમ લેવાનું ટાળ્યું છે.