તેજીની સાથે સાથે છેતરપિંડીની પ્રવૃત્તિ વધતી રહેશે...

સોશિયલ મિડિયાના માધ્યમથી ફિનઈન્ફ્લુઅન્સર્સ શિક્ષણ અને તાલીમના નામે શૅરોના ભાવોમાં મૅનિપ્યુલેશનની કેવી રમત ચલાવે છે એની પોલ ખૂલ્યા બાદ હવે ગેસ્ટ એક્સ્પર્ટ તરીકે સ્ટૉક્સ ખરીદીની સલાહ-ભલામણ આપીને રોકાણકારોને મૂર્ખ બનાવી પોતાની કમાણીનો ધંધો ચલાવતા લેભાગુઓનો પર્દાફાશ થયો છે.

- જયેશ ચિતલિયા

મેં ટીવીની જાણીતી બિઝનેસ ચૅનલ પર આવેલા એક એક્સ્પર્ટની ભલામણ બાદ ચોક્કસ શૅર લીધા અને ખરેખર કમાયો.., હું તો માર્કેટની ચાલ, વધ-ઘટ અને શૅરોની પસંદગી માટે બિઝનેસ ચૅનલ્સ નિયમિત જોઉં છું, મારો રોજનો નિયમ છે, માર્કેટ ખૂલતાં પહેલાં ટીવીચૅનલ જોવી, બપોરે ફરી એક વાર ચૅનલ પર નજર નાખી દેવાની, પછી બજાર બંધ થાય ત્યારે અને બીજા દિવસ માટે ફરી એ ચૅનલ જોઈને શૅર ખરીદવાનો-વેચવાનો નિર્ણય લેવાનો. શું એકથી એક ચડિયાતી સલાહ સાથે ટિપ્સ આપે છે... આપણે અભ્યાસ કરવાની જરૂર ન પડે, તૈયાર ઍડ્વાઈસ મળી જાય...

આવાં સંવાદો કે ચર્ચા આપણે ઘણી વાર સાંભળતાં હોઈએ છીએ, ખાસ કરીને ટ્રેડર્સ-સટોડિયા તો આ બધું જોયા જ કરતા હોય છે, નાના રોકાણકારો પણ ટીવીચૅનલ્સ પર આવતા નિષ્ણાતોથી અંજાઈ જતા હોય છે. એમને પૂછવામાં આવતા સવાલ, આ કહેવાતા નિષ્ણાતો દ્વારા અપાતા જવાબ, શૅર ખરીદવાની ભલામણો, વગેરે પર દિમાગ બંધ રાખી અમલ કરતો બહુ મોટો વર્ગ છે. આવા કથિત નિષ્ણાતો કઈ રીતે શ્રોતા રોકાણકારોને ગેરમાર્ગે દોરી પોતાની કમાણી કરી લે છે એનો સંભવતઃ પહેલી વાર ? ? મસ જબરદસ્ત પર્દાફાશ થયો છે. આ પર્દાફાશ નિયમન સંસ્થા સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)એ કર્યો છે.

આ ચૅનલ કઈ અને એક્સ્પર્ટ્સ કોણ?