વડાલ ગામે ઉમંગભેર ઊજવાયો વૈષ્ણવોત્સવ

સવા સો વીઘાં જમીન પર પુષ્ટિસંસ્કાર ધામનું પ્રથમ તબક્કાનું નિર્માણ પૂર્ણ.

- ધીરુ પુરોહિત

પુષ્ટિમાર્ગીય સંપ્રદાયમાં પરંપરાને જાળવી રાખી સમાજસેવાનાં કાર્યોને એક નવી દિશા આપવા ગિરનારની પાવન ભૂમિ નજીક વડાલમાં પુષ્ટિસંસ્કાર ધામના સાત દિવસના મહોત્સવે લાખો વૈષ્ણવોને હરખની હેલીમાં ભીંજવ્યા હતા.

વૈષ્ણવ સંપ્રદાય માટે આનંદ અને ઉત્સવની એ ઘડી હતી. પ્રસંગ હતો જૂનાગઢ નજીક વડાલ ગામની એ પાવન ભૂમિમાં એક સપ્તાહ સુધી પુષ્ટિસંસ્કાર ધામના સપ્તદિવસીય મહોત્સવની ઉજવણીનો. ગુજરાત જ નહીં, દેશ-વિદેશથી લાખો વૈષ્ણવોએ આ મહોત્સવમાં ભાગ લઈને પુષ્ટિમાર્ગીય સંપ્રદાયની પરંપરાને વૈશ્વિક સ્તરે આજની પેઢી સુધી લઈ જવા સંકલ્પ કર્યો. આચાર્યશ્રીઓના આશીર્વાદથી આ વિરાટ મહોત્સવમાં અનેક નવા પ્રકલ્પોનાં વિચારબીજ પણ રોપાયાં.

વૈષ્ણવાચાર્ય પીયૂષબાવાશ્રીઃ કર્મ અને ધર્મમાં માનવીને પૂર્ણતા અપાવે એવું આ પુષ્ટિસંસ્કાર ધામનું સર્જન છે.

વડાલના કાથરોટા રોડ પર વિશાળ જગ્યામાં ૧૪થી ૨૦ ડિસેમ્બર સુધી જૂનાગઢની મોટી હવેલીના વડપણ હેઠળ પુષ્ટિ સંપ્રદાયનો આ મહોત્સવ ઊજવાયો હતો. સંપ્રદાય માટે આ ઉત્સવ યાદગાર બની રહ્યો. પુષ્ટિસંસ્કાર ધામના બીજા તબક્કાનાં કાર્યોની શિલાન્યાસવિધિ હવેલીના આચાર્યશ્રીઓ, સંતો અને સમાજના અનેક વરિષ્ઠ આગેવાનોની હાજરીમાં વેદોક્ત મંત્રોચ્ચાર વચ્ચે સંપન્ન થઈ હતી.