ઈનકો સન્મતિ દે હનુમાન..

સાળંગપુર કષ્ટભંજન દેવના લાખો ભક્તોને આઘાત લાગે એવો કંકાસ ગયા સપ્તાહે રચાઈ ગયો. સાક્ષાત્ બજરંગબલી પણ સ્વામિનારાયણ પંથના આરાધ્ય પુરુષોના સેવક છે એવાં ભીંતચિત્રો પ્રકાશમાં આવતાં જે વિવાદ થયો એમાં આખરે સમાધાન થયું. જો કે ઠરી ગયેલી આગની રાખમાં છુપાયેલા અગ્નિના લબકારા ક્યારે ભડકો બની દઝાડવા લાગશે એ કહી શકાય એમ નથી.

- જયેશ દવે (ભાવનગર)

સાળંગપુરનો વિવાદ એની કિંગ ઑફ સાળંગપુર પ્રતિમા જેટલો જ મોટો થશે એવી કોઈને કલ્પના પણ નહોતી. ૨૦ ઓગસ્ટે સોશિયલ મિડિયા પર એક પોસ્ટ વાઈરલ થયા પછી શરૂ થયેલો આ કલહ સનાતન ધર્મીઓ વિરુદ્ધ સ્વામિનારાયણ સંપ્રદાય સુધી પહોંચી ગયો. જો કે કષ્ટભંજન દેવની જ કૃપા ગણો કે સંકટમોચનની કરુણા, એક અઠવાડિયા સુધી ગાજતો રહેલો આ વિવાદ સરકારની મધ્યસ્થી અને રાજ્યના મુખ્ય મંત્રી સાથે સંતોની બેઠક બાદ શાંત પડ્યો છે. સમાધાનની ફૉર્મ્યુલા પ્રમાણે સાળંગપુર હનુમાનની વિશાળ પ્રતિમા નીચેનાં વિવાદાસ્પદ ભીંતચિત્રો થઈ પણ જશે, પરંતુ વિવાદની સાથે સાથે વીંછીના દાબડા પણ ખૂલી રહ્યા છે.

સંભવિત ઉકેલ માટે સંતો, અગ્રણીની એક સમિતિની રચના કરવામાં આવી છે અને એમના નિર્ણય અનુસારની કાર્યવાહીની જાહેરાત કરવામાં આવી છે. વિવાદ પૂરો થવાની દિશામાં છે, પરંતુ ખરેખર પૂરો થયો કે સરળતાથી પૂરો થઈ જશે એ કહેવું હજી વહેલું છે.

ઘટનાક્રમ પર નજર કરીએ તો, રામાનંદી નવનિર્માણ સેના–ટ્રસ્ટ અને જામનગર જિલ્લાપ્રમુખ અપ્પુરાજા રામાવત ૨૦ ઓગસ્ટે સપરિવાર સાળંગપુર મંદિરે ગયા હતા. આ દરમિયાન કિંગ ઑફ સાળંગપુર પ્રતિમા પાસે પોતાના પરિવાર સાથેની તસવીરો મોબાઈલમાં લીધી. એ વખતે હનુમાનજીની વિશાળ પ્રતિમાની નીચે પ્લૅટફૉર્મ પર લગાવવામાં આવેલાં ભીંતચિત્રોને એમણે ધ્યાનથી જોયાં તો એમાં હનુમાનજી સહજાનંદ સ્વામી એટલે કે સ્વામિનારાયણ ભગવાનને પગે લાગતા હોય એવું દર્શાવાયું હતું. એમને આ ભીંતચિત્ર (મ્યુરલ) વાંધાજનક લાગ્યું એટલે અપ્પુરાજે આ વિશે વિગત જાણવા મંદિરમાં પૂછપરછ કરી, પરંતુ કોઈ સ્પષ્ટ જવાબ ન મળ્યો. સાળંગપુરથી પરત ફરતી વખતે અપ્પુરાજે ભીંતચિત્રોની તસવીરો સાથે પોસ્ટ લખીને સોશિયલ મિડિયામાં વહેતી કરી. આ પોસ્ટ અપલોડ થયાના બે-ત્રણ દિવસમાં જ આ મામલો ગરમ થઈ ગયો. એ પછી વિવાદની આગ એવી તો ફેલાઈ કે સનાતન ધર્મીઓ અને સ્વામિનારાયણ સંપ્રદાયના અનુયાયીઓ તથા સંતો સામસામા આવી ગયા.