જીએસટીના ઊંચા દર (ડર)થી બારેમાસ જુગારના બાર વાગશે?

ઑનલાઈન ગેમિંગ, કૅસિનો, હોર્સ રાઇડિંગ જેવી જુગારની રમત પરનો કર વધારવાના નિર્ણયની અસર સમજી લો.

- જયેશ ચિતલિયા

ઑનલાઈન ગેમિંગ પર પહેલી ઓગસ્ટથી ૨૮ ટકા જીએસટી લાગુ કરવાના જીએસટી કાઉન્સિલના નિર્ણયને પગલે લોકો જુગાર રમવાનું ઓછું કરશે કે બંધ કરશે ખરા? કે પછી આ જુગાર રમાડી લાખો-કરોડો કમાતી કંપનીઓ નવા રસ્તે નીકળશે એ તો આવનારો સમય કહેશે. અત્યારે તો આ ક્ષેત્રની લિસ્ટેડ કંપનીઓના શૅરના ભાવ તો ધડાધડ નીચે આવી રહ્યા છે. એના માલિકોને કરવેરાનો સૂચિત વધારો ભારેખમ લાગતો હોવાથી એનો વિરોધ થઈ રહ્યો છે. અલબત્ત, સરકારની તિજોરી વેરાની આવકથી છલકાવાની છે. એક અંદાજ મુજબ, સરકારની આ માર્ગે થતી જીએસટીની આવકમાં સંભવતઃ દસ ગણો વધારો થઈ શકે છે.

થોડા દિવસ અગાઉ યોજાયેલી જીએસટી કાઉન્સિલની બેઠકમાં ઘણા મહત્ત્વના નિર્ણય લેવામાં આવ્યા, જેમાંથી આ વિષય ચર્ચા અને કંઈક અંશે વિરોધ, વિવાદનો બન્યો છે. મુંબઈના જાણીતા ચાર્ટર્ડ એકાઉન્ટન્ટ શાર્દુલ શાહ ચિત્રલેખા સાથેની વાતચીતમાં કહે છેઃ 

‘નવા કરમાળખાથી ગેમિંગ કંપનીઓ પરનો કરવેરાનો ભાર ઘણો વધશે તો ખેલાડીઓ પર પણ ત્રણ ગણો બોજ આવશે. એક અંદાજ મુજબ, આ કંપનીઓ દસથી ૧૨ ટકાના માર્જિન પર બિઝનેસ કરે છે, જેથી ૨૮ ટકાનો બોજ એમને બિઝનેસ બંધ કરવા પર મજબૂર કરી શકે છે.'

ભારત છોડો, પરદેશ ચલો..