આ ગાંઠ ઝટ કેડૉ છૉડતી નથી!

અનેક મહિલાઓને સતાવતી ફાઈબ્રોઈડ્સની સમસ્યાના શું છે ઉકેલ?

- ડૉ. અર્ચના પારસ શાહ

ઘર અને બહારની બેવડી જવાબદારીને કારણે ઘણી મહિલા એટલી વ્યસ્ત રહે છે કે એ પોતાની તંદુરસ્તી પર પણ ધ્યાન આપી શકતી નથી. પોતાની પારિવારિક અને સામાજિક ફરજ નિભાવવાની મથામણમાં એ પોતાના આરોગ્ય અંગે બેદરકાર બની જાય છે, જેને કારણે લાંબા ગાળે એને અનેક બીમારીનો સામનો કરવો પડે છે. આવી એક બીમારી છે યુરિન ફાઈબ્રોઈડ્સ અથવા માયોમાસ એટલે કે ગર્ભાશયમાં થતી ગાંઠ.

ગર્ભાશયની દીવાલ પર વિકસતી આ સ્નાયુબદ્ધ ગાંઠો છે. એ કૅન્સરમાં પરિવર્તિત થવાની શક્યતા અત્યંત નહીંવત્ છે એટલે તમને ફાઈબ્રોઈડ્સ થાય તો તમને ગર્ભાશયનું કૅન્સર થવાની સંભાવના વધારે હોય એવું નથી. ફાઈબ્રોઈડ્સનાં કદ, આકાર અને સ્થાન અલગ અલગ હોય છે, જેમ કે ગર્ભાશય, ગર્ભાશયની દીવાલ અથવા એની સપાટી. આવી અમુક ગાંઠ તો એટલી સૂક્ષ્મ હોય છે કે એ સોનોગ્રાફીથી કે પણ જોઈ શકાતી નથી. હા, કેટલીક ગાંઠ મોટી હોય, જેનાથી ગર્ભાશયનાં કદ અને આકાર બન્ને પર અસર થાય છે. સામાન્ય રીતે ગર્ભાશયની ગાંઠ ૩૦-૪૦ વર્ષની વય ધરાવતી સ્ત્રીઓમાં જોવા મળે છે. જો કે આવી ગાંઠ કોઈ પણ ઉંમરે થઈ શકે છે. એનાં લક્ષણ ક્યારેક છેતરામણાં હોઈ શકે અર્થાત્ લક્ષણ હોય જ નહીં! ક્યારેક હોય તો પણ સાવ હળવાં હોય. જો કે અમુક કિસ્સામાં અત્યંત ગંભીર પણ હોય. ફાઈબ્રોઈડ્સનાં સામાન્ય લક્ષણો છેઃ

> ભારે, લાંબો અથવા પીડાદાયક માસિકસ્રાવ 

> પેટના નીચેના ભાગ અથવા પીઠમાં દર્દ

> સેક્સ માણતી વખતે પીડા