નકટું પાકિસ્તાન હવે નહીં તો ક્યારે સુધરશે?

વૈશ્વિક ત્રાસવાદના આશ્રયદાતા તરીકે વગોવાયેલા પાકિસ્તાનના વિદેશમંત્રીની સામે સામાન્ય રીતે ન ઉચ્ચારાતા શબ્દો બોલીને જયશંકરે એમનું નાક વાઢી નાખ્યું, પણ એ પછી પણ પાકિસ્તાન એનું વલણ બદલશે કે નહીં એ સવાલ છે.

- હીરેન મહેતા

એસ. જયશંકર અને બિલાવલ ભુટ્ટો-ઝરદારીઃ હેસિયતનું ભાન કરાવ્યું!

ભારત એની પરોણાગત માટે જાણીતું છે. આ એ દેશ છે જ્યાં તદ્દન અજાણ્યા માણસના આતિથ્યમાં પણ લોકો મોળા પડતા નથી. વ્યવસ્થાતંત્રમાં આટઆટલી ખામી અને આટઆટલી ઊણપ હોવા છતાં આ દેશ હજી ટક્યો છે એની આ લાગણી અને સંવેદનશીલતાને કારણે, પારકાને પણ પોતાના ગણી એને સાચવી લેવાની વૃત્તિને કારણે. બીજાને કોળિયો ખવડાવ્યા વગર પોતે અન્નનો દાણો મોંમાં ન મૂકતા હોય એવા હજારો લોકો આ દેશમાં હશે. બીજા લોકો આને ભલે વેવલાંવેડા કહે, આ ભારતની સંસ્કૃતિ છે, આ ભારતની ઓળખ છે.

કદાચ આ જ કારણે હમણાં વિદેશમંત્રી એસ. જયશંકરે પાકિસ્તાનના વિદેશપ્રધાન બિલાવલ ભુટ્ટો-ઝરદારીને જે રુક્ષ આવકાર આપ્યો અને ઉઘાડેછોગ પાકિસ્તાનની ઓળખ આતંકવાદના એક સમર્થક દેશ તરીકે આપી ત્યારે ઘણાને નવાઈ લાગી હશેઃ ઘરઆંગણે આવેલા મહેમાન સાથે આવું વર્તન?