સર્કિટ જેવા લોકો ફિલ્મની બહાર પણ બધાને મામુ બનાવવા બેઠા જ હોય છે!

સેબીએ બોલીવૂડ ઍક્ટર અર્શદ વારસી અને એની પત્ની સામે લીધેલું પગલું એ જ બોધપાઠ આપે છે કે સોશિયલ મિડિયાના માધ્યમથી આવી સેલિબ્રિટીઝ દ્વારા આપવામાં આવતી ઈન્વેસ્ટમેન્ટ ટિપ્સથી રહો સાવધાન.

- જયેશ ચિતલિયા

'સેબી'એ જેના પર રોકાણકારોને ‘મામુ’ બનાવવાનું આળ મૂક્યું છે એ અર્શદ વારસી પોતે જ છેતરાયો હોવાનો બચાવ કરે છે.

સંજય દત્તની ફિલ્મ મુન્નાભાઈ એમબીબીએસનો સર્કિટ એટલે કે ઍક્ટર અર્શદ વારસી બધાને યાદ હશે, પરંતુ આ અર્શદ વારસી, યુટ્યૂબ, શૅરબજાર અને સેબીને એકબીજા સાથે શું સંબંધ છે એવું કોઈ પૂછે કેવું લાગે? આમ તો સર્કિટ અને સેબીનો ક્યારેય પનારો પડ્યો હોય એવું લાગે નહીં.

- પણ ના, એવું નથી. નિયમન સંસ્થા સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)એ હમણાં અર્શદ વારસી સામે અમુક શૅરના ભાવમાં ખોટો ઉછાળો લાવવા ગોબાચારી આચરી હોવાનું આળ મૂક્યું છે અને હાલપૂરતો શૅરબજારમાં કામકાજ કરવા પર પણ પ્રતિબંધ મૂકી દીધો છે.

જો કે યાદ રહે, આ કિસ્સો એકલ-દોકલ નથી, લોકોનો લોભ ઘટતો નથી એટલે જૂના-નવા માર્ગે છેતરપિંડી થતી જ રહે છે.

સર્કિટના કિસ્સાની વાત કરીએ તો, અર્શદ વારસી અને એની પત્ની મારિયા ગોરેટીએ એક ખાનગી યુટ્યૂબ ચૅનલ મારફત ચોક્કસ કંપનીઓના શૅર સંબંધી ગેરમાર્ગે દોરતી માહિતીની રમતમાં સામેલ થઈને એમાંથી લાખોની કમાણી કરી હોવાનો આક્ષેપ છે. આમ તો આ એક છેતરપિંડી જ છે. સેબી સોશિયલ મિડિયાના માધ્યમથી શૅરબજારની લિસ્ટેડ કંપનીઓ સહિતનાં રોકાણજગત સંબંધી પ્રાઈસ રિગિંગ (ભાવોને કૃત્રિમ રીતે ઉછાળવા) અને અન્ય પ્રકારની ગેરરીતિ પર નજર રાખે છે, જેના ભાગરૂપ આ વખતે ચોક્કસ ફરિયાદોને આધારે સેબીની પકડમાં આ કલાકારોનો પણ વારો નીકળ્યો છે.

આ ઘટના લાખો રોકાણકારો માટે બોધપાઠ સમાન છે. આમાંથી શું બોધ લેવો, શું ધ્યાન રાખવું, કઈ રીતે ગેરમાર્ગે દોરનારા લોકોથી બચવું અને ખોટના ખાડામાં પડવાથી પોતાને કઈ રીતે સુરક્ષિત રાખવા એ સમજવા મળે છે.