બજેટમાં ટૂંકું નહીં, લાંબું જોવામાં છે સાર

આવતા નાણાકીય વર્ષ માટેનું અંદાજપત્ર એકંદરે ઘણું સારું છે. તેમ છતાં એની સામે અમુક સવાલ તો છે જ. ક્યાંક રાહત તો ક્યાંક બોજ છે, કંઈક છૂપું તો કંઈક જાહેર પણ છે. જો કે બજેટ કરતાં સરકારની નીતિઓને લાંબા ગાળાની દૃષ્ટિએ મૂલવવાનું વધુ મહત્ત્વનું ગણાય.

- જયેશ ચિતલિયા

આ વખતે બજેટ દરમિયાનના દિવસોમાં બજેટ કરતાં વધુ ચર્ચા અદાણી આ પ્રકરણની રહી અને બજાર પર એની અસર પણ જોરદાર જોવા મળી. ખેર, ગયા શુક્રવારે બજેટનું સપ્તાહ પૂરું થયું ત્યારે અદાણી પ્રકરણ જાણે શાંત પડી રહ્યું હોય એવો માહોલ ફેલાતો જોવાયો. જો કે આ માહોલ ક્યાં સુધી ચાલશે, સુધરશે કે બગડશે એ કહેવું મુશ્કેલ છે. અત્યારે તો જેની લાંબા ગાળાની અસર થવાની છે એવી બજેટની કેટલીક જોગવાઈની સાથે સરકારે ચાલાકીથી કેટલોક પરોક્ષ બોજ નાખી દીધો છે અને કેટલાંક સારાં કદમ લીધાં છે એની ઝલક જોઈએ.

ઈન્ફ્રાસ્ટ્રક્ચર પર જોર આપો, પણ..

ઈન્ફ્રાસ્ટ્રક્ચરના વિકાસ માટે સરકારે ૧૦ લાખ કરોડ રૂપિયા ખર્ચ કરવાની જોગવાઈ કરી એ આવકાર્ય, પણ આ સાથે સૌથી મોટો સવાલ એના અમલનો રહેશે. આ માળખાકીય વિકાસ સાથે રિઅલ એસ્ટેટનો તેમ જ એની સાથે સંકળાયેલા બીજા ઉદ્યોગોનો વિકાસ થશે એ વાત સાચી, પણ આ વિકાસ સાથે વધતી વસતિને પૂરી પાડવાની રહેતી પાયાની સુવિધાઓનું શું? એનો ઉપાય કઈ રીતે થશે એ સવાલ ઊભા રહે છે, જેમ કે પાણી, વીજળી, સુએજ સિસ્ટમ સહિત કેટલીય બાબતોને લગતી સમસ્યાના ઉપાય જરૂરી છે.

વેરાનાં નાણાં બચશે એ ક્યાં જશે?