ઢોલ ઢમક્યા ને વર-વહુના હાથ મળ્યા.. ઘરના ફળિયાથી દૂર!

છેલ્લાં થોડાં વર્ષથી ડેસ્ટિનેશન વેડિંગ જાનૈયા-માંડવિયામાં જબરાં લોકપ્રિય થયાં છે. ઘરઆંગણાથી દૂર રમણીય સ્થળે પરિવારજનો આત્મીયતાથી હળેમળે, લગ્ન ઉપરાંત વિવિધ પ્રસંગો માણે ને મોજ કરે એ વિચાર રોમાંચક છે.

- કેતન મિસ્ત્રી (મુંબઈ) । અરવિંદ ગોંડલિયા (સુરત) । મહેશ શાહ (અમદાવાદ) । દેવેન્દ્ર જાની (રાજકોટ) ।

જન્મભૂમિ છે જેમની મુંબઈ, પણ કર્મભૂમિ છે કેલિફોર્નિયા એવાં હેતલ અને કેતુલને એમનાં લગ્ન યાદગાર બનાવવાં હતાં. બન્નેના પરિવાર, સ્નેહીજન મુંબઈ-ગુજરાતમાં, પણ લગ્ન એમને મુંબઈથી દૂર કોઈ રળિયામણી જગ્યાએ કરવાં હતાં. લાંબા વિચારના અંતે એમણે તથા પરિવારજનોએ કળશ ઢોળ્યો સરોવરના શહેર તરીકે પ્રખ્યાત એવા ઉદયપુર પર.

રાજકોટના 'ચોકી ધાણી'માં મંગળફેરાની તૈયારી.

ઘરના આંગણા અને ફળિયાથી લઈને વાડી, બૅન્ક્વે હૉલ, મોટું મેદાન.. લગ્નનો પ્રસંગ વિસ્તરી રહ્યો છે. એમાં છેલ્લાં કેટલાંક વર્ષથી વર-કન્યા, સાજનમાજનને ડેસ્ટિનેશન વેડિંગનું ઘેલું લાગ્યું છે. ઘરથી દૂર કોઈ હિલસ્ટેશનના રિસોર્ટમાં કુદરતી સૌંદર્યની સમીપ લગ્નના પવિત્ર બંધનમાં બંધાવાનો આનંદ કંઈ ઔર હોય છે. અતિ અતિ ધનાઢ્ય પરિવારો યુરોપમાં લગ્ન યોજે છે, જ્યારે સુખી ઘરના શ્રેષ્ઠી ઉદયપુર, જોધપુર, જેસલમેરથી લઈને લોનાવલા, મહાબળેશ્વર, ગોવાથી લઈને ઈગતપુરી, વગેરે જેવાં સ્થળે લગ્ન યોજે છે, જ્યાં સંગીતસંધ્યા, મેંદી રસમ, બોહેમિયન લંચ, વગેરે ઈવેન્ટનાં આયોજન કરી લગ્નને એક કદીય ન ભુલાય એવી સુખદ ઘટના બનાવે છે. આ માટે ત્રણ-ચાર દિવસ કે અમુક કિસ્સામાં આખું અઠવાડિયું રિસોર્ટ્સ કે હોટેલ બુક કરાવવામાં આવે છે.

ગાંધીનારના 'અલોહા માં સરોવરની સાક્ષીએ નવજીવનનો આરંભ.

કેલિફોર્નિયાની કોડીલી કન્યા હેતલના પિતા વિનોદ માંડવિયા કહે છે: ડેસ્ટિનેશન વેડિંગનો સૌથી મોટો ફાયદો એ કે અંગત પરિવારજનો સાથે ત્રણ-ચાર દિવસ સતત હળવા-મળવાનું થાય, સંબંધો રિન્યુ થાય, સૌ પોતીકો પ્રસંગ સમજી એમાં મહાલે.’

ઉદયપુર ઍરપોર્ટથી આશરે કલાકના અંતર પર આવેલા ઑરિકા રિસોર્ટ્સમાં પ્રસંગ પાર પાડનારા વિનોદભાઈ, એમના વેવાઈ અને પરિવારજનોએ સતત ત્રણ દિવસ ૧૭૫થી વધુ મહેમાનોને કોઈ ને કોઈ ઍક્ટિવિટીમાં વ્યસ્ત અને મસ્ત રાખ્યા. સૂફી નાઈટ, કાર્નિવલ (રાજસ્થાની મેળો), સંગીતસંધ્યા, ગેમ્સ, વગેરે. હા, લગ્નવિધિ તો ખરી જ.

ડેસ્ટિનેશન મૅરેજ કરવા ઈચ્છતા પરિવારો જો નયનરમ્ય પ્રાકૃતિક સ્થાનની પસંદગી ઈચ્છતા હોય તો એમના માટે ગુજરાતમાં એક ઉમદા સ્થાન છે પાટનગર ગાંધીનગર નજીક આવેલો અલોહા હિલ્સ ઍન્ડ રિસોર્ટ્સ. સાબરમતી નદી નજીક અંદાજે સાતસો વીઘાંમાં ફેલાયેલો અલોહા હિલ્સ ઍન્ડ રિસોર્ટ્સ ડેસ્ટિનેશન વેડિંગ માટેનું પરફેક્ટ વેન્યૂ છે.