આ નિયમન બનવાનું છે મોટો પડકાર

‘ગૂગલ’ને થયેલા જંગી દંડ જેવા વધુ દાખલા બેસાડી સરકારે ‘ડિજિટલ ઈન્ડિયા’ ઝુંબેશ માટે લોકોને ભરોસો આપવાનો છે.

- જયેશ ચિતલિયા

દેશમાં ડિજિટલ ઈન્ડિયાનાં ગાણાં જોરશોરથી ગવાઈ રહ્યાં છે. કરોડોની સંખ્યામાં ઑનલાઈન બિઝનેસ અને નાણાકીય વ્યવહારો થઈ રહ્યા છે. આ સામે ડિજિટલ કૌભાંડોની સંખ્યા પણ સતત વધી રહી છે. જો કે મસમોટાં ડિજિટલ પ્લૅટફૉર્મ ખુદ પણ ઘણી ગેરરીતિ કરી રહ્યાં હોવાનું બહાર આવતું જાય છે, એનો તાત્કાલિક ઉપાય કરવા નિયમન માળખાને મજબૂત બનાવવું અનિવાર્ય છે.

ઓટીટી પ્લૅટફૉર્મ પરની ઝમતારા નામની એક સિરીઝ બહુ લોકપ્રિય બની છે. ઝમતારા મધ્ય ભારતનું એક નાનું ગામ છે. આ ગામના અનેક લોકો ઑનલાઈન આર્થિક વ્યવહારોનાં કૌભાંડોમાં સક્રિય છે. આ ગામના અનેક યુવાનો કઈ રીતે લોકોને પોતાની જાળમાં ફસાવીને લૂંટી લે છે એ દર્શાવાયું છે. આ જાળમાં સતત મોબાઈલ નંબર બદલાવીને-એનાં સિમ કાર્ડ ચેન્જ કરીને તેમ જ જુદી જુદી યુવતીઓના અવાજ કાઢીને ડેબિટ-ક્રેડિટ કાર્ડ સહિતના વિવિધ નાણાકીય વ્યવહારોના નામે ડરાવીને ફસાવવામાં આવે છે. આ કોઈ ફિક્શન નથી, બલકે ફૅક્ટ છે. આ ઝમતારા તો એક ઉદાહરણ છે, આવાં ઘણાં નાનાં-મોટાં ગામ કે શહેરોમાં ડિજિટલ અપરાધો કરનારી ટોળકીઓ બિલાડીના ટોપની જેમ ફૂટી નીકળી છે.