ખાડો ખોદે એ સિવાયના લોકો પણ પડે! કોઈ સમજણા અને શિક્ષિત યુવાનને આવા હિંસક વિચાર આવે જ કેમ?

રિક્ષાવાળાએ મિનિસ્ટરને પાછા આપેલા રૂપિયા સાથે એક ચિઠ્ઠી હતી, જેમાં લખ્યું હતું કે..

- રાજુ પટેલ

'મને લાગે છે કે મારો દીકરો અવનીશ કાં યોગેશ મ્હાત્રે અને રમેશ યાદવ પર હુમલો કરશે કાં એમની ઑફિસમાં તોડફોડ કરશે. એને કોઈક રીતે શાંત કરવો પડશે.’ હરસુખ દત્તાણી નામના પ્રોફેસર અમને વિનંતી કરી રહ્યા હતા.

ના, એમ ન સમજતા કે એક સુશિક્ષિત પિતાના મવાલી દીકરાની આ વાત છે. અવનીશ તો એના પિતા કરતાં વધુ ભણવા વિદેશ ગયો હતો અને અર્થશાસ્ત્રમાં ઊંચી ડિગ્રી લઈ હમણાં જ ભારત પાછો આવ્યો છે. હવે એ ઈકોનોમિક્સના શિક્ષણમાં જ કેટલાક પ્રયોગ કરવા માગે છે અને એ માટે શિક્ષણમંત્રીને મળવાનો પણ છે.

- તો આવો, સમજણો અને શિક્ષિત યુવાન હિંસક વિચારો પર કેમ આવી ગયો?

ત્રણ મહિના અગાઉ અવનીશ ભારત પરત આવ્યો અને પોતાના શૈક્ષણિક પ્રોજેક્ટના પ્રેઝન્ટેશનની તૈયારી કરવા લાગ્યો. થોડા સમય બાદ ચોમાસું બેઠું અને કાચી સડક પરનો કાદવ ધોવાઈ જાય એમ મુંબઈના રસ્તા પરની સપાટી ધોવાઈને ગાબડાં પાડવા માંડી. ઠેર ઠેર ખાબોચિયાં બનવા માંડ્યાં. અનેક કારણોસર આમેય મુંબઈમાં રસ્તા પર ખોદકામ ચાલતું જ રહે છે અને એટલે ટ્રાફિક ખોડંગાતો હોય છે. એમાં વળી આ વરસાદનાં પાણીના ઘા પડ્યા અને રસ્તા વધુ સાંકડા થઈ ગયા.