અનેરી આર્ય: આર્ય રમણીની અનેરી ગાથા

આંખ નબળી છે, પણ એની નજર લક્ષ્ય સુધી બરોબર પહોંચે છે. જીવનમાંથી એ ઘણું શીખી છે અને હવે વિદ્યાર્થીઓને ભણાવે છે. કોણ છે આ ‘કૌન બનેગા કરોડપતિ’ની લખપતિ વિજેતા?

- અરવિંદ ગોંડલિયા

નમસ્કાર, દેવીઓ ઔર સજ્જનો.. આજ ‘પ્રિયદર્શિની’ કી શોભા બઢા રહી હૈ, સુરત કી રહેનેવાલી પ્રતિભાશાલી સન્નારી અનેરી આર્ય..

તમે વિચારતા હશો કે અમિતાભ બચ્ચન ફેમ કેબીસી એટલે કે કૌન બનેગા કરોડપતિની સ્ટાઈલમાં કેમ પરિચય અપાઈ રહ્યો છે. તો એનો જવાબ છે, આ અનેરી કેબીસીની હૉટ સીટ પર બિગ બી-બચ્ચન સાહેબ સામે બેસીને આવી છે.. અને માત્ર બેઠી જ નથી, પચ્ચીસ લાખ રૂપિયા જેવી માતબર રકમ પણ જીતી છે. તમે કહેશો તો શું થઈ ગયું? એવી તો ઘણી મહિલા આ શોમાં શું આનાથી પણ વધારે રૂપિયા જીતી ચૂકી છે.

વાત સાચી છે, પણ આ અનેરી આર્યની વાત જરા અનેરી છે. એને જન્મથી એક આંખમાં રોશની નથી મળી અને બીજી આંખથી પણ એ કહેવા પૂરતું, બહુ જ ધૂંધળું જોઈ શકે છે. પ્રિયદર્શિની સાથે થયેલી વાતમાં અનેરીએ કેબીસી અને પોતાના અંગત જીવન વિશે ખૂલીને વાત કરી છે, જે ચોક્કસ તમામ મહિલા માટે (અને પુરુષો માટે પણ) પ્રેરણાદાયી છે.

કૌન બનેગા કરોડપતિ શોમાં પચ્ચીસ લાખ રૂપિયા જીતીને સુરતની અનેરીએ પોતાની પ્રતિભાનાં દર્શન કરાવ્યાં. જો કે એ પહેલાં જ અનેરી એની સ્વઓળખ બનાવી ચૂકી હતી. હા, કેબીસીથી દેશભરમાં નામના ચોક્કસ મળી. પોતાના જીવનની સંઘર્ષમય યાત્રા વિશે વાત કરતાં અનેરી પ્રિયદર્શિનીને કહે છે:

'જન્મથી જ આંખમાં રોશની નહોતી એ મારા કરતાં મારાં મમ્મી-પપ્પાનો વધુ પ્રોબ્લેમ હતો. ક્યારેક કોઈ પ્રસંગોપાત એવું લાગ્યું કે આંખની સંપૂર્ણ રોશની હોત તો સારું થાત, પણ આ અપૂર્ણતાને મેં જીવનમાં ક્યારેય મજબૂરી કે લાચારી નથી બનવા દીધી. એનું પ્રથમ શ્રેય મારાં મમ્મી-પપ્પાને જાય છે. હું મારાં મમ્મી-પપ્પાની આંખોથી જ દુનિયા જોતી થઈ અને એક દિવસ એ જ આંખોના અપાર સ્નેહને કારણે દુનિયાભરમાં મને ઓળખ મળી.’