બંગાળ શિક્ષકભરતી કૌભાંડ રોકડા ફેંકો... નોકરી લે લો

પશ્ચિમ બંગાળમાં ‘તૃણમૂલ કોંગ્રેસ પક્ષ’ બહુમતીમાં હોવા છતાં મુસીબતનો સામનો કરી રહ્યો છે. દેશભરમાં ભાજપની લહેર વચ્ચે શહેર વચ્ચે મમતા બેનરજી મમતા બેનરજી માટે બંગાળમાં પોતાનો ગઢ સાચવી રાખવું મુશ્કેલ બનતું જાય છે. મમતા પછી નંબર-ટુ મનાતા અને અત્યાર સુધી મિસ્ટર ક્લીનની છબી ધરાવતા હેવીવેઈટ નેતા પાર્થ ચેટરજી પાસેથી શિક્ષક કૌભાંડમાં ૫૦ કરોડ રૂપિયા રોકડા મળતાં દેશભરમાં ચર્ચા જામી છે.

- ઉમંગ વોરા

પાર્થ ચેટરજી અને અર્પિતા મુખરજીઃ સરકારી સ્કૂલ-કૉલેજમાં શિક્ષકોની ભરતી માટે લાંચના ૫૦ કરોડ ભેગા કર્યા?

ચા૨ દિવસમાં બે દરોડા. કબજે કરવામાં આવેલી કુલ રકમ ૫૦ કરોડ રૂપિયાથી વધુ. છોગામાં પાંચ કરોડનું સોનું અને બીજી અનેક મોંઘી ચીજવસ્તુ.

ક્યાં પાડવામાં આવ્યા હતા આ દરોડા?

પશ્ચિમ બંગાળના ઉદ્યોગમંત્રી પાર્થ ચેટરજીનાં ખાસ મૈત્રિણી એવાં અર્પિતા મુખરજીના ઘરે.

બંગાળના રાજકારણમાં ગરમાટો લાવી દે એવી આ ઘટના છે. રાષ્ટ્રપ્રમુખની ચૂંટણીમાં મોટા ઉપાડે પોતાના પક્ષના યશવંત સિંહાનું નામ ઘોષિત કરી પાટલીબદલુ જેવું નિવેદન કરનારાં બંગાળનાં મુખ્ય મંત્રી મમતા બેનરજી માટે આ દરોડા બહુ મોટા આંચકા સમાન હતા. આખરે તો પાર્થ ચેટરજી એમના પક્ષ તૃણમૂલ કોંગ્રેસના વરિષ્ઠ નેતા અને પ્રવક્તા હતા.

મમતા બેનરજીએ કોંગ્રેસમાંથી છૂટા થઈ બંગાળમાં તૃણમૂલના નામે પોતાનો નોખો ચોકો બનાવ્યો એ વખતથી આ પાર્થ ચેટરજી એમની સાથે હતા. પક્ષની સ્થાપનાથી માંડી બહુ ટૂંકા ગાળામાં એનાં ઘડતર અને વિકાસમાં આ પાર્થબાબુનો પણ મોટો ફાળો હતો. એવા સાથીદારને ત્યાં (કહેવા ખાતર એમની મૈત્રિણીને ઘરે) દરોડા પડે અને ત્યાંથી કરોડો રૂપિયા મળે એટલે મમતા દીદીને આંચકો લાગે એ સહજ હતું. પહેલાં તો દીદીએ આખી વાતને ભાજપનું કાવતરું ગણાવી દીધું. એનું કારણ એ કે અર્પિતા મુખરજીના ઘરે દરોડા કેન્દ્ર સરકાર હસ્તકના એન્ફોર્સમેન્ટ ડિરેક્ટોરેટ (ઈડી)એ પાડ્યા હતા. ભાજપવિરોધી પક્ષના અનેક આગેવાનો અત્યારે ઈડીના નિશાન બની રહ્યા છે એટલે શરૂઆતમાં બંગાળની પ્રજાએ પણ મમતાની વાત માની લીધી. જો કે પછી તો મમતા જ હકીકત પામી ગયાં એટલે એમણે પાર્થ ચેટરજીને પ્રધાનપદેથી ગડગડિયું આપી દીધું. એટલું જ નહીં, એ પછી મમતાએ પાર્થબાબુની તરફેણમાં હરફ સુદ્ધાં ઉચ્ચાર્યો નથી. પોતાનો જ રૂપિયો ખોટો હોય ત્યાં ઈડીને શું દોષ દેવાનો?