ઉપરાષ્ટ્રપતિ ધનખડનું રાજીનામું : ૨૧મી જુલાઈએ દિવસ દરમિયાન શું બન્યું?

અત્યારે દિલ્હીનાં રાજકીય વર્તુળોમાં નવા ઉપરાષ્ટ્રપતિ માટે અનેક નામો વહેતાં મૂકાય છે અને ચર્ચામાં છે, પરંતુ વડાપ્રધાન નરેન્દ્ર મોદીની કાર્યપદ્ધતિથી પરિચિત લોકો જાણે છે કે જે નામો વહેતાં થાય છે તેમાંના કોઈને ઉપરાષ્ટ્રપતિ બનાવાશે નહીં

- ચાણક્ય

જગદીપ ધનખડે ઉપરાષ્ટ્રપતિ પદેથી ૨૧મી જુલાઈની રાત્રે અચાનક રાજીનામું આપીને કેન્દ્રની એનડીએ સરકાર અને વિપક્ષ સહિત સૌને ચોંકાવી દીધા. ૨૧મી જુલાઈનો સાંજનો ઘટનાક્રમ એટલો ઝડપી અને આકસ્મિક હતો કે તાત્કાલિક તેના વિશે કોઈ કશું બોલી શક્યું નહીં. ધનખડ ઍપૉઇન્ટમૅન્ટ લીધા વિના જ રાત્રે રાષ્ટ્રપતિ દ્રૌપદી મુર્મુને મળવા રાષ્ટ્રપતિ ભવન પહોંચી ગયા હતા અને રાજીનામાનો પત્ર સુપરત કર્યો હતો. રાજીનામાના પત્રમાં તેમણે તેઓ તેમના સ્વાસ્થ્યને અગ્રતા આપવા ઇચ્છતા હોવાથી તાત્કાલિક અસરથી રાજીનામું આપી રહ્યા હોવાનું જણાવ્યું હતું. રાષ્ટ્રપતિએ તેમના રાજીનામાનો સ્વીકાર કર્યો હતો અને રાજીનામું આગળની કાર્યવાહી માટે ગૃહમંત્રાલયને મોકલી આપ્યું હતું. એ પછી જગદીપ ધનખડે એક્સ પર તેમના રાજીનામાની જાહેરાત કરી હતી. આ ઘટનાક્રમના પંદર કલાક પછી બીજા દિવસે ૨૨મી જુલાઈની બપોરે વડાપ્રધાન નરેન્દ્ર મોદીએ માત્ર ત્રણ લાઇનમાં એક્સ પર સંદેશ મૂક્યો. તેમણે લખ્યું, શ્રી જગદીપ ધનખડજીએ ભારતના ઉપરાષ્ટ્રપતિપદ સહિત અનેક ભૂમિકાઓમાં દેશની સેવા કરવાની તક મળી છે. હું તેમને ઉત્તમ સ્વાસ્થ્યની શુભેચ્છા પાઠવું છું. આમ, ઉપરાષ્ટ્રપતિના અચાનક રાજીનામામાં પંદર કલાક પછી સરકારમાંથી પહેલું રિએક્શન આવ્યું. તેનું અર્થઘટન જ એવું થાય છે કે મામલો ધારવામાં આવે છે એટલો આસાન નથી. અંદરખાને કોઈ ગરબડ નિશ્ચિત હોવાનો સંકેત છે.

બીજા દિવસે પણ સરકારના તમામ પ્રધાનો સહિત બધા લોકો મૌન રહ્યા હતા. અમિત શાહ, રાજનાથસિંહ, જે.પી. નડ્ડા, નિર્મલા સીતારામન સહિતના તમામ વરિષ્ઠ પ્રધાનો મૌન રહ્યા. સોશિયલ મીડિયાથી લઈને પ્રત્યક્ષ રીતે પણ કોઈએ કશું રિએક્શન આપ્યું નહીં. એકમાત્ર રિકિશન જેવા ત્રીજી હરોળના નેતાએ બાઇટ આપતા એવું કહ્યું હતું કે કોઈના સ્વાસ્થ્ય અંગે વિરોધ પક્ષોએ રાજનીતિ કરવી જોઈએ નહીં.

જોકે રાજનીતિના જાણકાર પંડિતો માને છે કે સરકારના ટોચના નેતાઓના મૌનમાં જ રાજીનામાનો શોર છુપાયેલો છે. જો ધનખડનું રાજીનામું સામાન્ય સંજોગોમાં હોત તો તેમને માટે એક સારો વિદાય સંદેશ આવ્યો હોત. રાજ્યસભામાં તેઓ તેમનું વિદાય પ્રવચન પણ આપી શક્યા હોત. એવું કશું જ બન્યું નહીં.