ഇത് ഹൈബ്രിഡ് ഫണ്ടുകളിൽ നിക്ഷേപിക്കാനുള്ള സമയം

ഓഹരി വിപണി ചാഞ്ചാട്ടം തുടരുകയും പലിശ കുറയുകയും ചെയ്യുന്നതിനാൽ ചെറുകിട നിക്ഷേപകർ ഹൈബ്രിഡ് ഫണ്ടുകളെ കൂടുതലായി ഉപയോഗപ്പെടുത്തണം. അതിലൂടെ റിസ്ക് കുറയ്ക്കാനും ന്യായമായ നേട്ടമെടുക്കാനും കഴിയും, പറയുന്നത് ഡിഎസ്പി മ്യൂച്വൽ ഫണ്ട് മാനേജിങ് ഡയറക്ടറും സിഇഒയുമായ കൽപന പരേഖ്.

- കൽപൻ പരേഖ് എംഡി & സിഇഒ, ഡിഎസ്പി മ്യൂച്വൽ ഫണ്ട്

കഴിഞ്ഞ മാസങ്ങളിൽ സ്വന്തം പോർട്ട് ഫോളിയോയിൽ ഹൈബ്രിഡ് ഫണ്ടുകളുടെ വിഹിതം 36 ശതമാനമായി ഉയർത്തിയത് എന്തുകൊണ്ട് എന്ന ചോദ്യത്തിനുള്ള മറുപടിയായാണ് അദ്ദേഹം ഈ നിർദേശം മുന്നോട്ടുവച്ചത്. ഉയർന്ന റിട്ടേണിനു പിന്നാലെ പോകുന്നതിനെക്കാൾ റിസ്ക് കുറച്ച്, ന്യായമായ നേട്ടമെടുക്കാനാണ് നിക്ഷേപകനെന്ന നിലയിൽ ഞാൻ മുൻതൂക്കം നൽകുന്നതെന്നും അദ്ദേഹം വ്യക്തമാക്കി. ഹൈബ്രിഡ് ഫണ്ടുകൾ നിക്ഷേപകർക്ക് എങ്ങനെ ഉപയോഗപ്പെടുത്താമെന്ന് കൽപൻ പരേഖ് വിശദീകരിക്കുന്നു.

ഹൈബ്രിഡ് ഫണ്ടിന് പ്രസക്തി കൂടുന്നത് എന്തുകൊണ്ട്?

ഇന്ത്യയിൽ പല ഓഹരികളുടെയും വില ഉയർന്ന തലത്തിലാണ്. വിപണി ചാഞ്ചാട്ടം കൂടുതലുമാണ്. സ്ഥിര നിക്ഷേപ പലിശ കുറയുകയാണെങ്കിലും കടപ്പത്രങ്ങളും സ്വർണവും വെള്ളിയും നല്ല ആദായം തരുന്നു.

ഇതെല്ലാം വിലയിരുത്തുമ്പോൾ നിക്ഷേപകർക്ക് റിസ്ക് കുറയ്ക്കാനും ന്യായമായ റിട്ടേൺ നേടാനും ഇപ്പോൾ ഹൈബ്രിഡ് ഫണ്ടുകൾ ഉപകരിക്കും.

ഹൈബ്രിഡ് ഫണ്ട് എല്ലാവർക്കും അനുയോജ്യമാണ്, റിസ്കെടുക്കാൻ കഴിയുന്നവർക്കും അല്ലാത്തവർക്കും. കാരണം, ഇവയിൽ ഒന്നിലധികം ആസ്തികളുള്ളതിനാൽ ഒന്നിൽ നഷ്ടം സംഭവിച്ചാലും മറ്റേതിലെ നേട്ടം കൊണ്ട് അതു ബാലൻസ് ചെയ്യാം.

ഓഹരി, സ്വർണം, വെള്ളി, ഡെറ്റ് ഫണ്ട് എന്നിവയെല്ലാം കഴിഞ്ഞ ഏതാനും വർഷങ്ങളിൽ നല്ല നേട്ടം നൽകിയിട്ടുണ്ട്. കടപ്പത്രങ്ങളിൽ ആദായം ഏഴു ശതമാനത്തോളമാണെങ്കിലും വിലയിൽ 11-12 വരെ ശതമാനം വർധനയുണ്ടായി. അതിനാൽ ഇപ്പോൾ ഒരു പദ്ധതിയിൽ അല്ല, പല പദ്ധതികളിലായി നിക്ഷേപിച്ചാൽ ആദായവും സുരക്ഷയും വർധിപ്പിക്കാം. അതിനുള്ള ലളിതവും മികച്ചതുമായ മാർഗമാണ് ഹൈബ്രിഡ് ഫണ്ടുകൾ.

ഹൈബ്രിഡ് ഫണ്ട് എന്ത്, എങ്ങനെ?

രണ്ടോ മൂന്നോ വ്യത്യസ്ത നിക്ഷേപ പദ്ധതികളുടെ ഒരു മിശ്രിതമായ മ്യൂച്വൽ ഫണ്ട് സ്കീമാണ് ഹൈബ്രിഡ് ഫണ്ട്. അത് ഇന്ത്യൻ ഓഹരികളും ഇന്ത്യൻ കടപ്പത്രങ്ങളും ചേർന്നതാകാം. അല്ലെങ്കിൽ ഇന്ത്യൻ ഓഹരികളും അമേരിക്കയിലെയോ മറ്റേതെങ്കിലും രാജ്യത്തെയോ ഓഹരികളുമാകാം.

നിക്ഷേപം രണ്ടിലധികം വ്യത്യസ്ത ആസ്തികളിലാണെങ്കിൽ അത്തരം ഹൈബ്രിഡ് ഫണ്ടുകളാണ് മൾട്ടി അസെറ്റ് ഫണ്ടുകൾ. ഓഹരി, ബോണ്ട് എന്നിവയ്ക്ക് പുറമേ സ്വർണം, വെള്ളി പോലുള്ള കമ്മോഡിറ്റികളാകും പലപ്പോഴും മൂന്നാമത്തെ ആസ്തി.