പൊന്നുമോൾക്കായി സുകന്യസമൃദ്ധി നിക്ഷേപിക്കുംമുൻപ് അറിയേണ്ടത്

അടുത്തകാലത്തു വന്ന മാറ്റങ്ങളടക്കം മനസ്സിലാക്കി നിക്ഷേപിച്ചാലേ സുകന്യ സമൃദ്ധിയുടെ നേട്ടം നിങ്ങൾക്ക് ഉറപ്പാക്കാനാകൂ.

- ബാലകൃഷ്ണൻ തക്കങ്ങോട് ധനകാര്യ നിരീക്ഷകനും റിട്ട. പ്രധാന അധ്യാപകനുമാണ് ലേഖകൻ

പെൺകുട്ടികളുടെ വിദ്യാഭ്യാസം, വിവാഹം എന്നിവയ്ക്ക് ആവശ്യമായ തുക സ്വരൂപി ക്കാനുള്ള മികച്ച നിക്ഷേപ പദ്ധതിയാണ് സുകന്യ സമൃദ്ധി യോജന (SSY). 15 വർഷ നിക്ഷേപം വഴി 70 ലക്ഷത്തിലധികം രൂപവരെ സമ്പാദിക്കാവുന്ന പദ്ധതിയാണിത്. നിക്ഷേപിക്കുന്നതിന്റെ ഇരട്ടിയിലധികം തുക പലിശയായി ലഭിക്കും. ബാങ്ക് പോസ്റ്റ് ഓഫിസ് പദ്ധതികളെ അപേക്ഷിച്ച് നിലവിൽ 8.2% എന്ന ഉയർന്ന പലിശയും ലഭിക്കും. കേന്ദ്ര സർക്കാർ പദ്ധതിയായതിനാൽ നിക്ഷേപത്തിനും പലിശയ്ക്കും ഗാരന്റിയുമുണ്ട്. പോസ്റ്റ് ഓഫിസ്, തിരഞ്ഞെടുത്ത ബാങ്ക് ശാഖകൾ എന്നിവയിലൂടെ ചേരാം. നിക്ഷേപതുകയ്ക്ക് 80സിയിൽ ആദായ നികുതിയിളവു ലഭിക്കും. കാലാവധിക്കുശേഷം ലഭിക്കുന്ന തുകയും പലിശയും നികുതിമുക്തമാണ്.

ആർക്കു ചേരാം?

പത്തുവയസ്സുവരെയുള്ള പെൺകുട്ടികളുടെ പേരിൽ മാതാപിതാക്കൾക്കോ നിയമപരമായുള്ള രക്ഷാകർ ത്താക്കൾക്കോ അക്കൗണ്ട് ആരംഭിക്കാം. ഒരു പെൺ കുട്ടിയുടെ പേരിൽ ഒരു അക്കൗണ്ട് തുറക്കാനാവൂ. ഒരു കുടുംബത്തിൽനിന്നു രണ്ടു കുട്ടികളുടെ പേരിലേ തുടങ്ങാനാകൂ. ഇരട്ടകളാണെങ്കിൽ രണ്ടിലധികം കുട്ടികളെ പരിഗണിക്കും.

എന്താണു പദ്ധതി?

10 വയസ്സ് പൂർത്തിയാകും മുൻപ് ആരംഭിച്ച് 15 വർഷം തുടർച്ചയായി നിക്ഷേപിക്കണം. ആരംഭിക്കാൻ 250 രൂപ മതി. തുടർന്ന് 50ന്റെ ഗുണിതങ്ങളായി ഒരു വർഷം പരമാവധി 1,50,000 രൂപ നിക്ഷേപിക്കാം. ഒരു വർഷം 250 രൂപയെങ്കിലും നിക്ഷേപിച്ചിരിക്കണം. 21 വർഷം കഴിഞ്ഞു പദ്ധതി പൂർത്തിയാകുമ്പോൾ അക്കൗണ്ടിലുള്ള മുതലും പലിശയും പൂർണമായും പിൻവലിക്കാം.

കേന്ദ്രസർക്കാർ മൂന്നു മാസത്തിലൊരിക്കൽ പലിശ പ്രഖ്യാപിക്കും. നിലവിൽ 8.2 ശതമാനമാണ്. വാർഷിക അടിസ്ഥാനത്തിൽ കൂട്ടുപലിശ കണക്കാക്കി ആ തുക സാമ്പത്തിക വർഷാവസാനം അക്കൗണ്ടിൽ ചേർക്കും. കൂട്ടുപലിശയുടെ ആനുകൂല്യം നിക്ഷേപവളർച്ചയ്ക്കു വേഗം കൂട്ടും.

കാലാവധി 21 വർഷം