ബാങ്ക് ചെക്ക് ജീവിതത്തിന്മേൽ ചെക്ക് പറയാതിരിക്കാൻ

നിങ്ങൾ നൽകിയ ചെക്ക് അക്കൗണ്ടിൽ പണമില്ലാതെ മടങ്ങിയാൽ ഇരട്ടി പിഴയും ജയിൽശിക്ഷയുംവരെ ലഭിക്കാം.

- മനോജ് തോമസ്

RTGS, NEFT, IMPS മുതൽ ഗൂഗിൾ പേവരെ ലളിതവും നൂതനവും ദ്രുതഗതിയിൽ ഫണ്ട് കൈമാറ്റം ചെയ്യപ്പെടുന്നതുമായ ആധുനിക സങ്കേതങ്ങൾ ലഭ്യമാണെങ്കിലും ഇന്നും ബിസിനസ് ഇടപാടുകൾക്ക് ചെക്ക് ഒഴിച്ചുകൂടാനാകാത്ത ഘടകംതന്നെ.

എന്തുകൊണ്ട് ചെക്ക്?

വലിയ തുകകൾ കൈമാറുന്ന ബിസിനസ് ആവശ്യങ്ങൾക്ക് എളുപ്പവും സുരക്ഷിതവുമായ മാർഗമാണ് ചെക്ക് മേൽപറഞ്ഞ ആധുനിക സങ്കേതങ്ങളോടുള്ള അജ്ഞതയോ വിമുഖതയോ അല്ല, മറിച്ച് ചെക്ക് ഉപയോഗത്തിനു ചില പ്രധാന കാരണങ്ങൾ കൂടിയുണ്ട്.

പല ബിസിനസ് ഇടപാടുകളിലും വാങ്ങലിനോ, വിൽക്കലിനോ ഒപ്പം പണം കൈമാറ്റം നടക്കാറില്ല. ഉദാഹരണത്തിന് ഉൽപന്നം നൽകി പതിനഞ്ചു ദിവസത്തിനകമാണ് ഒരു ചെറു കച്ചവടക്കാരൻ, ഉൽപന്നമെത്തിച്ച മൊത്ത കച്ചവടക്കാരനു പണം നൽകേണ്ടതെന്നിരിക്കട്ടെ. ഇവിടെ ഉൽപന്നം നൽകിയാൽ ഉടൻ സപ്ലയർ കച്ചവടക്കാരനിൽ നിന്നും ഒരു പോസ്റ്റ് ഡേറ്റഡ് ചെക്ക് വാങ്ങും. കച്ചവടക്കാരനാകട്ടെ, പതിനഞ്ചു ദിവസം കഴിഞ്ഞ് പണം ലഭ്യമാകുംവിധമാവും ചെക്ക് നൽകുക.

മൊത്ത കച്ചവടക്കാരൻ ലഭിച്ച ചെക്ക്, തീയതിയനുസരിച്ച് ബാങ്കിൽ നിക്ഷേപിക്കും. ഒരേ ബാങ്കിലാണ് രണ്ടു പേരുടേയും ഇടപാടെങ്കിൽ ഒരു ട്രാൻസ്ഫർ വഴി പണം അയാളുടെ അക്കൗണ്ടിൽ എത്തും. രണ്ടുപേരുടെയും അക്കൗണ്ട് രണ്ടു ബാങ്കിലാണെങ്കിൽ ക്ലിയറിങ്ങിലൂടെയാകും പണം അക്കൗണ്ടിലെത്തുക.