പുതിയ പെൻഷൻ പദ്ധതി വിരമിക്കൽ പ്രായം കൂട്ടുമോ? പെൻഷനു പരിധി വരുമോ?

സംസ്ഥാന സർക്കാരിന്റെ പ്ലാൻ ബിയിൽ നിലവിലെ പെൻഷൻ പ്രായം 60 ലേക്ക് ഏകീകരിക്കുമോ എന്ന ആശങ്കയാണ് യുവാക്കൾക്കെങ്കിൽ ഉയർന്ന പെൻഷൻ തുകയ്ക്ക് പരിധി വരുമോ എന്നതാണ് ജീവനക്കാരുടെ ഭയം

- 

സംസ്ഥാന സർക്കാർ ജീവനക്കാർക്കും അധ്യാപകർക്കും വേണ്ടി പുതിയ പെൻഷൻ പദ്ധതി നടപ്പിലാക്കാനുള്ള ധനമന്ത്രിയുടെ പ്രഖ്യാപനം ഒറ്റനോട്ടത്തിൽ പ്രതീക്ഷ പകരുന്നതാണെങ്കിലും അത് എത്രത്തോളം പ്രായോഗികമാകുമെന്നാണ് ബന്ധപ്പെട്ടവർ ഉറ്റുനോക്കുന്നത്. പങ്കാളിത്ത പെൻഷൻ ഉപേക്ഷിക്കുമെങ്കിലും സ്റ്റാറ്റ്യൂട്ടറി പദ്ധതിയിലേക്കു മടങ്ങില്ലെന്ന സർക്കാർ നിലപാടും ജീവനക്കാരുടെ ആശങ്ക വർധിപ്പിക്കുന്നു. പങ്കാളിത്ത പെൻഷൻ പദ്ധതിയിലൂടെ ലഭിക്കാവുന്ന ദീർഘകാലനേട്ടം പുതിയ പദ്ധതിയിൽ നഷ്ടപ്പെട്ടേക്കാമെന്ന നിരാശയും അവർക്കിടയിലുണ്ട്. പങ്കാളിത്ത പെൻഷൻ പിൻവലിച്ച് സ്റ്റാറ്റ്യൂട്ടറി പെൻഷൻ തിരികെ കൊണ്ടുവരികയെന്നതായിരുന്നു ജീവനക്കാരുടെ ദീർഘകാലമായുള്ള ആവശ്യം.

തിരിച്ചുപോക്കിനു പിന്നിൽ

പങ്കാളിത്ത പെൻഷൻ പദ്ധതിയിൽ ലഭിക്കുന്ന പെൻഷനിലെ അനിശ്ചിതത്വം ജീവനക്കാർക്കിടയിൽ പരക്കെ ആശങ്ക സൃഷ്ടിച്ചിട്ടുണ്ട്. ഓഹരിവിപണി അടക്കമുള്ളവയിൽ നിക്ഷേപിക്കുന്നതിനാൽ നിശ്ചിത തുക കൃത്യമായി ലഭിക്കുമെന്ന് ഉറപ്പാക്കാനാവില്ല. വിപണി ചാഞ്ചാട്ടം അനുസരിച്ച് പെൻഷൻ തുക കൂടുകയോ കുറയുകയോ ചെയ്യാം. 2013ൽ ആണ് കേരളത്തിൽ പങ്കാളിത്ത പെൻഷൻ ആരംഭിച്ചത്. അന്ന് സർവീസിൽ പ്രവേശിച്ച ചില ജീവനക്കാർ ഇപ്പോൾ വിരമിക്കൽ ഘട്ടത്തിലെത്തിയിട്ടുണ്ട്. അവർക്കു ലഭിക്കുന്നത് നാമമാത്ര പെൻഷനാണെന്നത് മാറി ചിന്തിക്കാൻ സർക്കാരിനു പ്രേരകമായിട്ടുണ്ട്.

ജീവനക്കാരെ വാർധക്യകാലത്ത് സാമ്പത്തിക അരക്ഷിതാവസ്ഥയിലേക്കു തള്ളിവിടാനാകില്ലെന്നുള്ള തിരിച്ചറിവാണ് ഈ തീരുമാനത്തിനു പിന്നിൽ. മാത്രമല്ല, പങ്കാളിത്ത പെൻഷൻ പിൻവലിക്കുമെന്ന വാഗ്ദാനം നൽകിയാണ് കഴിഞ്ഞ രണ്ടു തവണയും എൽഡിഎഫ് സർക്കാർ അധികാരത്തിലേറിയത്.

പങ്കാളിത്ത പെൻഷനിൽ മാറ്റമില്ല