സാധാരണ സംരംഭം, മാസം 3 ലക്ഷം വരുമാനം

 ജീവിതത്തിൽ ഒരു നല്ല സംരംഭകനാകണമെന്നും മികച്ച വരുമാനത്തിനൊപ്പം ഏതാനും പേർക്ക് ജോലി കൂടി കൊടുക്കണമെന്നും ആഗ്രഹിച്ച ഒരു വിമുക്തഭടന്റെ വിജയകഥ.

- ടി.എസ്. ചന്ദ്രൻ മുൻ ഡപ്യൂട്ടി ഡയറക്ടർ സംസ്ഥാന വ്യവസായ-വാണിജ്യ വകുപ്പ്

സഞ്ജു ദേവരാജൻ പ്ലസ് ടു കഴിഞ്ഞപ്പോൾത്തന്നെ പട്ടാളത്തിൽ ചേർന്നു. അതിനൊപ്പം ബികോം പഠിച്ചു പാസായി. പതിനേഴരവർഷത്തെ സൈനിക സേവനത്തിനുശേഷം 2017 ൽ വിരമിച്ചു.

ഒരു സംരംഭം എന്ന തന്റെ സ്വപ്നം നിറവേറ്റാനായി പിന്നീടുള്ള ശ്രമം. ബന്ധുവിന്റെ സ്ഥലത്ത് ഒരു ഫ്ലോർമിൽ തുടങ്ങി. എന്നാൽ, അധികകാലം മുന്നോട്ടു പോകാനായില്ല. സ്ഥലത്തിന്റെ പേരിൽ കേസായി, ഒഴിയേണ്ടി വന്നു. വലിയ നിരാശയ്ക്കൊപ്പം ഭീമമായ പണനഷ്ടവും സംഭവിച്ചു. ഇനി സംരംഭവുമായി മുന്നോട്ടു പോകണ്ടെന്നു വീട്ടുകാരും കൂടി പറഞ്ഞതോടെ നല്ലൊരു ജോലിക്കായി ശ്രമം.

അങ്ങനെ ദുബായിലേക്കു വണ്ടി കയറി. അവിടെ സെക്യൂരിറ്റി ജീവനക്കാരനായി. വിസിറ്റിങ് വിസയുടെ കാലാവധി തീർന്നപ്പോൾ നാട്ടിലേക്ക് തിരിച്ചുപോരേണ്ടി വന്നു. ഇവിടെ വന്നിട്ട് ഫയർ ആൻഡ് സേഫ്റ്റി കോഴ്സ് പഠിച്ചു പാസായി. 25,000 രൂപ ശമ്പളത്തിൽ ഫയർ ആൻഡ് സേഫ്റ്റി ഓഫിസറായി ജോലി ചെയ്തു. ഒപ്പം ഒട്ടേറെ ആനുകൂല്യങ്ങളും ഉണ്ടായിരുന്നു. എന്നാൽ, സ്വന്തമായി ഒരു സംരംഭം തുടങ്ങണമെന്ന് അതിയായ ആഗ്രഹവും കുറച്ചുപേർക്കെങ്കിലും ജോലി നൽകണമെന്ന ചിന്തയും നിമിത്തം ആ ജോലി അധികം വൈകാതെ ഉപേക്ഷിച്ചു.

ഫ്ലോർ ആൻഡ് ഓയിൽ മിൽ

ഇത്തവണ തേങ്ങ സംഭരണം, ഉണക്കൽ, ആട്ടൽ, വില, ശുദ്ധത, ലാഭം എന്നിവയെക്കുറിച്ചെല്ലാം നന്നായി പഠിച്ച ശേഷമാണ് മുന്നോട്ടു പോയത്. കറിമസാലകൾ, ധാന്യപ്പൊടികൾ എന്നിവയുടെ സാധ്യതകൾ, വിശ്വാസ്യത എന്നിവയും മനസ്സിലാക്കി. നേരത്തേ ഫ്ലോർമിൽ നടത്തിയ പരിചയം തുണയായി. ആഗ്രഹം അംഗീകരിച്ച ഭാര്യയും മകളും കട്ടയ്ക്ക് കൂടെ നിന്നപ്പോൾ വീടിനടുത്ത് ഭരണിക്കാവിൽ ഒരു കെട്ടിടം വാടകയ്ക്ക് എടുത്തു.