മെഡിസെപ് ഭാവി എന്ത്?

സംസ്ഥാന സർക്കാർ പുതുതായി അവതരിപ്പിച്ച മെഡിസെപ് ആരോഗ്യ ഇൻഷുറൻസ് പദ്ധതി, നിലവിലെ പ്രശ്നങ്ങൾ പരിഹരിച്ചു വിജയിക്കാനുള്ള സാധ്യത എത്രത്തോളം

- രാജ്യശ്രീ എസ്.

ആറു വർഷത്തെ കാത്തിരിപ്പിനു വിരാമമിട്ട്, സർക്കാർ ജീവനക്കാർക്കും പെൻഷൻകാർക്കും കേരള സർക്കാർ നടപ്പാക്കുന്ന ചികിത്സാ കവറേജ് പദ്ധതിയായ മെഡിസെപ് ജൂലൈ ഒന്നിന് മുഖ്യമന്ത്രി പിണറായി വിജയൻ ഔദ്യോഗികമായി ഉദ്ഘാടനം ചെയ്തിരിക്കുന്നു. വിവിധ ആശുപത്രികളിൽ ചികിത്സ തേടിയെത്തിയവർക്ക് പദ്ധതിയുടെ ആനുകൂല്യങ്ങൾ ലഭ്യമാക്കി തുടങ്ങിയിട്ടുമുണ്ട്.

പദ്ധതി വമ്പൻ തന്നെ

പതിനൊന്നു ലക്ഷത്തോളം ജീവനക്കാരും അവരുടെ കുടുംബാംഗങ്ങളുമടക്കം 30 മുതൽ 40 ലക്ഷം വരെ പേർക്കെങ്കിലും ഒരു വർഷം മൂന്നു ലക്ഷം രൂപയുടെ ചികിത്സാ കവറേജ് ലഭ്യമാക്കുന്ന ബൃഹത് പദ്ധതിയാണ് മെഡിസെപ് എന്നതിൽ സർക്കാരിന് അഭിമാനിക്കാം.

ദീർഘകാലം നിലനിൽക്കേണ്ട വൻപദ്ധതിയായ മെഡിസെപ് നടപ്പാക്കുന്ന ഓറിയന്റൽ ഇൻഷുറൻസ് എന്ന പൊതുമേഖലാ കമ്പനിയും പദ്ധതിയിൽ ക്ലെയിം കൈകാര്യം ചെയ്യുന്ന തേഡ് പാർട്ടി അഡ്മിനിസ്ട്രേറ്റർമാരായ വിദാൽ ഹെൽത്ത് ഇൻഷുറൻസും ഫാമിലി ഹെൽത്ത് പ്ലാൻ ഇൻഷുറൻസും വളരെ വലിയൊരു ദൗത്യമാണ് ഏറ്റെടുത്തിരിക്കുന്നത്.

വർഷങ്ങളോളം നീണ്ട പ്രയത്നത്തിനൊടുവിൽ ഏറെ വെല്ലുവിളികൾ തരണം ചെയ്താണ് സർക്കാർ പദ്ധതി ആരംഭിച്ചിരിക്കുന്നത്. ഇപ്പോഴും പ്രശ്നങ്ങളും പ്രതിസന്ധികളും തുടരുകയുമാണ്. ഈ ബാലാരിഷ്ടതകളെല്ലാം മറികടന്ന് പദ്ധതി മികവുറ്റതായി മാറുമെന്നു  ധനമന്ത്രി കെ. എൻ.ബാലഗോപാൽ വ്യക്തമാക്കുന്നു. പദ്ധതിയെ അട്ടിമറിക്കാനുള്ള ശ്രമങ്ങളെ നേരിടാൻ കർശന നടപടികൾ സ്വീകരിക്കുമെന്നും അദ്ദേഹം അറിയിച്ചിട്ടുണ്ട്. ഈ സാഹചര്യത്തിൽ സർക്കാർ ജീവനക്കാർക്ക് പെൻഷൻകാർക്ക് അറിയേണ്ട ചിലതുണ്ട്. പ്രഖ്യാപനങ്ങളെല്ലാം സാക്ഷാൽക്കരിച്ചു പദ്ധതി മികച്ച രീതിയിൽ, വിജയകരമായി മുന്നേറുമോ? ചെലവിനെക്കുറിച്ച് ആശങ്കപ്പെടാതെ മികച്ച ചികിൽസ ഇഷ്ടമുള്ള ആശുപത്രികളിൽ നേടാനാകുമോ? ജീവിതകാലം കവറേജ് ഉറപ്പാക്കി മെഡിസെപ് നിലനിൽക്കുമോ? ഇക്കാര്യങ്ങളെക്കുറിച്ച് അറിയാം തുടർപേജുകളിൽ.

മികവുകൾ ഏറെ

വിപണിയിൽ ലഭ്യമായ മറ്റേതു ഹെൽത്ത് പോളിസിയെക്കാളും തനതായ സവിശേഷകളുണ്ടെന്നത് മെഡിസെപ്പിനെ വേറിട്ടു നിർത്തുന്നു.