கர்நாடக் காங்கிரஸ் கரைசேருமா? கும்மியடிக்கும் குடும்ப அரசியல்!

தென் மாநிலங்களிலேயே கர்நாடகாவில் தான் குடும்ப அரசியல் உக்கிரமாக தாண்டவமாடுகிறது. பா,ஜ.க. காங்கிரஸ், மதச்சார்பற்ற ஜனதாதளம் ஆகிய கட்சிகளின் குடும்ப அரசியல் ஆதிக்கம் வலுவாக உள்ளது. முதலாவதாக முன்னாள் பிரதமர் தேவகவுடா குடும்பத்தின் குடும்ப அரசியலை கவனிப்போம். முன்னாள் பிரதமரான தேவகவுடா, மதச்சார்பற்ற ஜனதாதளத்தின் நிறுவனர் ஆவார்

- ஆரணலோங்கல்

அவர் இந்தியப்பிரதமராக உயர்ந்த போதிலும் அவரது பார்வை கர்நாடக பொதுப்பணித்துறை அமைச்சரின் கண்ணோட்டமாகவே இருந்தது. அதை தாண்டி அவரால் நோக்க முடியவில்லை.

ஒரு கட்சியின் தலைவராக இருந்த போதிலும் தனது குடும்பத்தின் நலனைத்தாண்டி வேறு எதையும் அவரால் சிந்திக்க முடியவில்லை. அவரது மகன் குமாரசாமி முன்னாள் முதலமைச்சர் ஆவார். அவர் சென்னப்பட்டினா தொகுதியில் மதச்சார்பற்ற ஜனதாதளம் சார்பில் போட்டியிடுகிறார். அவரை எதிர்த்து இத்தொகுதியில் பா.ஜ.க. சார்பில் சி.பி.யோகஸ்வர் போட்டியிடுகிறார். அவரது சகோதரர் எச்.டி ரேவண்ணாவும் களத்தில் உள்ளார். அதுமட்டுமல்லாமல் குமாரசாமியின் மனைவி அனிதா குமாரசாமி, மகன் நிகில் குமாரசாமி ஆகியோரும் மதச்சார்பற்ற ஜனதாதளத்தில் வலுவான ஆதிக்கத்தை செலுத்தி வருகிறார்கள்.

நிகில் குமாரசாமி இத்தேர்தலில் ராமநகரம் தொகுதியில் வேட்பாளராக போட்டியிடுகிறார். ரேவண்ணாவின் மனைவி பவானி, மகன் சுரேஜ் ரேவண்ணா எம்.எல்.சி, மற்றொரு மகன் பிரஜ்வால் ரேவண்ணா எம்.பி. ஆகியோரும் மதச்சார்பற்ற ஜனதாதளத்தின் முக்கிய புள்ளிகளாக செயல்பட்டு வருகின்றனர். ஒட்டுமொத்தமாக பார்த்தால் தேவகவுடா குடும்பத்தைச் சேர்ந்த 8 பேர் அஷ்ட திசை எங்கும் ஆதிக்கம் செலுத்தி வருகின்றனர்.

குடும்ப அரசியலை ஏற்காத கட்சி பா.ஜ.க. என்று பிரதமர் மோடியும் உள்துறை அமைச்சர் அமித்ஷாவும் வாய்நோகாமல் வார்த்தை பந்தல் போட்டாலும் உண்மை இதற்கு புறம்பானது. அநேகமாக எல்லா மாநிலங்களிலும் பா.ஜ.க.வில் வாரிசு அரசியல் கொடி கட்டிப்பறக்கிறது. இதற்கு கர்நாடகாவும் விதிவிலக்கு அல்ல.