സമുദ്രക്കൃഷിയിലുണ്ട് അനന്തസാധ്യതകൾ

കടൽമത്സ്യങ്ങൾ, കടൽപായലുകൾ എന്നിവയുടെ കൃഷിയും മൂല്യവർധനയും

- ഡോ. ഗ്രിൻസൺ ജോർജ്

തീരദേശ വിഭവങ്ങളും സമുദ്രവും ചേർന്നുള്ള സമ്പദ് വ്യവസ്ഥയാണ് ബ്ലൂ ഇക്കോണമി. സുസ്ഥിര വളർച്ചയ്ക്കും പുതിയ തൊഴിലവസരങ്ങൾക്കും വഴി തുറക്കുന്നതിലൂടെ ഇന്ത്യയുടെ കാർഷികമേഖലയ്ക്ക് കരുത്തു പകരാൻ ഇതിനു സാധിക്കും. പരമ്പരാഗത കർഷകർ, യുവ സംരംഭകർ, സ്ത്രീകൾ എന്നിവർക്കൊക്കെ ഈ രംഗത്ത് അവസരമുണ്ടെന്ന് പഠനങ്ങൾ വ്യക്തമാക്കുന്നു.

സമുദ്രമത്സ്യക്കൃഷി

ആഴക്കടലിൽ മത്സ്യം വളർത്തുന്ന മാരികൾചർ സാങ്കേതിക വിദ്യയിൽ ഭാരതം വലിയ നേട്ടങ്ങൾ കൈവരിച്ചുകഴിഞ്ഞു. മത്സ്യത്തൊഴിലാളികൾക്കും കർഷകർക്കും അധിക വരുമാനം ഉറപ്പാക്കുന്നതിനായി 10 കിലോമീറ്റർ വരെ ദൂരപരിധിയിൽ 146 സമുദ്രമത്സ്യകൃഷി പ്രദേശങ്ങൾ കണ്ടെത്തിയിട്ടുണ്ട്. ഇവിടെനിന്ന് വർഷം തോറും ഏകദേശം 21.3 ലക്ഷം ടൺ ഉൽപാദനം സാധ്യമാണ്. ഇത്തരത്തിലുള്ള ഒരു യൂണിറ്റ് ഏകദേശം 3 ലക്ഷം രൂപ വരുമാനം നൽകുമെന്നാണ് പ്രതീക്ഷ. അവിടെ കൂടുമത്സ്യകൃഷിയിലൂടെ കരിമീൻ, കാളാഞ്ചി, മോത തുടങ്ങിയ ഉയർന്ന വിപണിമൂല്യമുള്ള മത്സ്യങ്ങളെ വളർത്താം. ഇതുമായി ബന്ധപ്പെട്ട ചില മുന്നേറ്റങ്ങൾ ശ്രദ്ധേയമാണ്.

വളവോടി വറ്റ പ്രജനനകേന്ദ്രം: ഈ രംഗത്തെ ഏറ്റവും വലിയ നേട്ടങ്ങളിലൊന്ന്, വളവോടി വറ്റയുടെ മികച്ചയിനം കുഞ്ഞുങ്ങളെ ഉൽപാദിപ്പിക്കുന്നതിനുള്ള ന്യൂക്ലിയസ് ബ്രീഡിങ് സെന്റർ ആണ്. കൊടുങ്ങല്ലൂരിനടുത്ത് അഴീ ക്കോടുള്ള സംസ്ഥാന സർക്കാർ വളവോടി വറ്റ ഹാച്ചറി കേരളത്തിലെ മത്സ്യക്കർഷകർക്ക് ഇവയുടെ ശുദ്ധമായ വിത്തുകൾ ഉറപ്പാക്കാൻ സഹായിക്കുന്നു.