റിട്ടോർട്ടിങ് മെഷീൻ

രാസസംരക്ഷകങ്ങൾ ചേർക്കാതെ ഭക്ഷ്യവിഭവങ്ങൾ ദീർഘകാലം സൂക്ഷിക്കാൻ റിട്ടോർട്ട് പായ്ക്കിങ്

- ജിസ്സി ജോർജ്

ലോകത്ത് ഏറ്റവും വിപ്ലവകരമായ ഗവേഷണങ്ങളും മാറ്റങ്ങളും നടക്കുന്നത് ഭക്ഷ്യ സംസ്കരണ മേഖലയിലാണ്. പുതുമയോടെയും പോഷക ഗുണം ചോർന്നു പോകാതെയും എങ്ങനെ ഭക്ഷണം സൂക്ഷിച്ചു വയ്ക്കാം എന്ന അന്വേഷണത്തിനു ശിലായുഗത്തോളം പഴക്കമുണ്ട്. സാങ്കേതികവിദ്യകൾ പുരോഗമിക്കുന്നതോടെ യന്ത്രസാമഗ്രികൾ, പാക്കിങ്, സംസ്കരണം, ഭക്ഷ്യസംരക്ഷകങ്ങൾ എന്നിവയിൽ വലിയ മുന്നേറ്റമുണ്ടായി. അവയിൽ ഏറെ സാധ്യതകൾ തുറക്കുന്ന മാറ്റമാണ് റിട്ടോർട്ട് പാക്കിങ്. തയാറാക്കിയ ഭക്ഷ്യവിഭവങ്ങൾ രാസ സംരക്ഷകങ്ങൾ ചേർക്കാതെ ദീർഘകാലം അന്തരീക്ഷ ഊഷ്മാവിൽ സൂക്ഷിച്ചു വയ്ക്കാമെന്നതാണ് ഈ രീതി യുടെ നേട്ടം. പൾപ്പുകൾ, കറികൾ (മത്സ്യ-മാംസ വിഭവങ്ങൾ ഉൾപ്പെടെ), ബിരിയാണി, പായസങ്ങൾ, കറികൾ തയാറാക്കാനുള്ള ഗ്രേവികൾ, കപ്പ, കാച്ചിൽ, ചേന, ചേമ്പ്, മധുര ക്കിഴങ്ങ്, ചക്ക എന്നിവ പ്രത്യേകം വേവിച്ചതോ കൂട്ടിയോജിപ്പിച്ചതോ ആയ പുഴുക്കുകൾ, ചക്കവരട്ടി, പഴം വരട്ടി, കരിക്കും വെള്ളവും ചേർന്ന പാനീയങ്ങൾ എന്നിങ്ങനെ വ്യത്യസ്തവും രുചികരവുമായ വിഭവങ്ങൾ രാസസംരക്ഷകങ്ങൾ ചേർക്കാതെ, വീട്ടിലുണ്ടാക്കുന്ന രുചിയോടെ കഴിക്കാമെന്നതാണ് മെച്ചം. ഫ്രിജ്, ഫ്രീസർ, കോൾഡ് സ്റ്റോറേജ് എന്നിവയിലല്ലാതെ 6 മാസം മുതൽ 2 വർഷം വരെ സൂക്ഷിക്കാനാകും.

റിട്ടോർട്ടിങ് മെഷീൻ