തക്കാളി വാട്ടമില്ലെങ്കിൽ നേട്ടം

തക്കാളിക്കൃഷിക്കു യോജിച്ച കാലമാണിത്

-  ആർ. വീണാറാണി അഡീഷനൽ ഡയറക്ടർ (റിട്ട.), കൃഷിവകുപ്പ്. e-mail: [e-mail], veena4raghavan@gmail.​com

അത്യുൽപാദനശേഷിയുള്ള തക്കാളി ഇനങ്ങളാണ് ശക്തി, മുക്തി, അനഘ, വെള്ളയാണി വിജയ് എന്നിവ. അർക്ക വികാസും അർക്ക് സൗരഭും ബെംഗളുരുവിലെ ഇന്ത്യൻ ഹോർട്ടികൾചർ റിസർച് ഇൻസ്റ്റിറ്റ്യൂട്ട് പുറത്തിറക്കിയ അത്യുൽപാദനശേഷിയുള്ള ഇനങ്ങളാണ്. സാഹോ, ശിവം, ലക്ഷ്മി എന്നിവയാണ് ഹൈബ്രിഡ് ഇനങ്ങളിൽ മികച്ചത്.

തൈ തയാറാക്കാം

കീട, രോഗമുക്തമായ ചകിരിച്ചോർ കംപോസ്റ്റ്, വെർമിക്കുലേറ്റ്, പെർലൈറ്റ് എന്നിവ 3:1:1 അനുപാതത്തിൽ നനച്ച് പുട്ടുപൊടി പരുവത്തിലാക്കി പ്രോട്രേകളിൽ നിറയ്ക്കണം. ആവശ്യമായ ജലാംശം നിലനിർത്തിക്കൊണ്ടു തന്നെ കൂടുതലുള്ള വെള്ളം വാർന്നു പോകാൻ സൗകര്യം, വേരുകളുടെ സമൃദ്ധമായ വളർച്ചയ്ക്കു വായുസഞ്ചാരം എന്നിവ ഈ മിശ്രിതം ഉറപ്പു വരുത്തും. തുടർന്നു വിത്തു പാകാം. സ്യൂഡോമോണാസ് പുരട്ടിയ വിത്ത് പായിൽ വച്ച് വിരൽകൊണ്ടു മെല്ലെ അമർത്തുക. തൈകൾ മുളച്ച് രണ്ടില പ്രായമാകുമ്പോൾ വളപ്രയോഗം ആരംഭിക്കാം. വെള്ളത്തിൽ അലിയുന്ന 19:19:19 രാസവളക്കൂട്ട് ഒരു മില്ലിഗ്രാം ഒരു ലീറ്റർ വെള്ളത്തിൽ കലക്കി 5 ദിവസത്തിലൊരിക്കൽ തളിച്ചു കൊടുക്കണം. 20-25 ദിവസം പ്രായമാകുമ്പോൾ തൈ പറിച്ചു നടാം.