പശുക്കളുടെ മികവിൽ ജിൻസിന്റെ മുന്നേറ്റം

പശുക്കൾ 60, വാർഷിക വിറ്റുവരവ് ഒരു കോടി രൂപ

- ഐബിൻ കാണ്ടാവനം

ശരാശരി 20 ലീറ്റർ വീതം കറവയുള്ള 60 പശുക്കൾ. ഒരു കോടി രൂപയ്ക്കു മേൽ വാർഷിക വിറ്റുവരവുള്ള ജിൻസിന്റെ വിജയരഹസ്യം പശുക്കളുടെ എണ്ണത്തിലും ഉൽപാദനശേഷിയിലുമുള്ള ഈ വലുപ്പം തന്നെ. 10 വർഷം മുൻപ് 10 പശുക്കളുമായാണ് ഇടുക്കി കമ്പംമെട്ട് വാണിയ പുരയ്ക്കൽ ജിൻസ് കുര്യൻ ഡെയറി ഫാം തുടങ്ങിയത്. ഇന്നു പശുക്കളുടെ എണ്ണം 60. ദിവസം ശരാശരി 700 ലീറ്റർ പാൽ വിൽക്കുന്നു. വാർഷിക വരുമാനമാവട്ടെ, ഒരു കോടി രൂപയ്ക്കു മുകളിൽ. ഗുണമേന്മയേറിയ കൂടുതൽ പശുക്കളുള്ളതിനൊപ്പം പരമാവധി തീറ്റച്ചെലവു കുറച്ചതുമാണ് ഈ ക്ഷീരസംരംഭത്തിന്റെ വിജയത്തിനു പിന്നിൽ. ഏതൊരു ക്ഷീരകർഷകനെയുംപോലെ ഒട്ടേറെ പ്രശ്നങ്ങൾ നേരിടുന്നുണ്ടെങ്കിലും അവ അപ്പപ്പോൾ പരിഹരിക്കാനും ജിൻസ് ശ്രദ്ധിക്കുന്നു.

പത്തിൽ നിന്നു മുപ്പതിലേക്ക് 

കുടുംബത്തിൽ മൂന്നു പതിറ്റാണ്ടായി ചെറിയ രീതിയിൽ പശുവളർത്തലുണ്ടായിരുന്നു. എന്നാൽ, പുതിയ വീടു നിർമിച്ച് താമസം മാറിയപ്പോൾ ജിൻസ്, പഴയ വീടിനോടു ചേർന്ന് ഒരു ഷെഡ് നിർമിച്ചു. ക്ഷീരവികസന വകുപ്പിന്റെ മിൽക്ക് ഷെഡ് പദ്ധതി പ്രകാരം 10 പശുക്കളെയും വാങ്ങി. ക്രമേണ പശുക്കളുടെ എണ്ണം വർധിപ്പിച്ച് മുപ്പതിലെത്തിച്ചു.

കുത്തിവച്ചിട്ടും കുളമ്പുരോഗം