പുളിക്കത്തടത്തിലെ കുടംപുളി വിശേഷം

കുടംപുളികളുടെ നാടായ പുളിക്കത്തടത്തിന്റെ 10 കിലോമീറ്റർ മാത്രം ചുറ്റളവിലാണ് വാഗമൺ, ഇല്ലിക്കക്കല്ല്, ഇലവീഴാപൂഞ്ചിറ എന്നീ വിനോദ സഞ്ചാരകേന്ദ്രങ്ങൾ

- രജീഷ് നിരഞ്ജൻ

 കുടംപുളി കൊണ്ട് ജീവിതം പച്ചപിടിപ്പിച്ച കുടിയേറ്റ കർഷകരുടെ നാടാണ് പുളിക്കത്തടം. മലമുകളിൽ ഇടതൂർന്നു വളരുന്ന, നൂറ്റാണ്ടു പിന്നിട്ട പുളിമരങ്ങൾ. പാറക്കെട്ടുകളും നീർച്ചോലകളുമായി വന്യഭംഗി തുളുമ്പുന്ന 50 ഏക്കറോളം വരുന്ന ഈ പുളിമരക്കാട്ടിൽ 38 കർഷക കുടുംബങ്ങളാണ് വസിക്കുന്നത്.

ഇടുക്കിയിലെ മൂലമറ്റം- വാഗമൺ റോഡിൽ, എടാട് കവലയിൽനിന്നു 2 കിലോമീറ്റർ ചെങ്കുത്തായ മലമ്പാത താണ്ടി വേണം ഈ പുളിമലയിൽ എത്താൻ. കുടംപുളിയില്ലാത്ത ഒരു വീട്ടുവളപ്പും ഇവിടെയില്ല. കാലങ്ങൾകൊണ്ട് തനിയെ ഉണ്ടായി വന്നതാണ് മരങ്ങളിലേറെയും. വൻ വൃക്ഷങ്ങളായതിനാൽ വിളപരിചരണം ആവശ്യമില്ല.

രോഗ, കീടബാധകളും നന്നേ കുറവ്. അതിനാൽ കാര്യമായ കൃഷിച്ചെലവുമില്ല. ആണ്ടുതോറും കർഷകന് പ്രകൃതിയുടെ വരംപോലെ വരുമാനം.