ആലപ്പുഴയിലെ പക്ഷിഡോക്ടർ

വെറ്ററിനറി പഠനത്തിലേക്കു നയിച്ചത് അച്ഛന്റെ അരുമപ്രേമം

- ഐബിൻ ജോസഫ്

അരുമപ്പക്ഷികൾക്ക് അസുഖം വന്നാൽ കേരളത്തിലെ മിക്ക അലങ്കാരപ്പക്ഷിപ്രേമികളും ഓടിയെത്തുന്ന വെറ്ററിനറി ആശുപത്രിയുണ്ട് ആലപ്പുഴയിൽ, സാറാസ് ബേർഡ്സ് ആൻഡ് എക്സോട്ടിക് അനിമൽ ഹോസ്പിറ്റൽ, കുഞ്ഞു ബഡ്ജെറിഗാർ മുതൽ വമ്പൻ മക്കാവ് വരെയുള്ള ഓമനപ്പക്ഷികളെ മാത്രമല്ല, നായ്ക്കളും പൂച്ചകളും തുടങ്ങി ഇഗ്വാനവരെയുള്ള അരുമജീവികളെയും ചികിത്സിക്കാനുള്ള വിദഗ്ധരും സംവിധാനങ്ങളും ഇവിടെയുണ്ട്.

സംസ്ഥാനത്തെ അറിയപ്പെടുന്ന യുവ വെറ്ററിനറി ഡോക്ടർമാരിലൊരാളായ റാണി മരിയ തോമസാണ് ആശുപത്രിയുടെ ഉടമ. ആശുപത്രിയോടൊപ്പം സ്വന്തമായി എക്സോട്ടിക് പെറ്റ് ഫാമും നടത്തുന്നു ഡോ. റാണി മരിയ. വെറ്ററിനറി സയൻസ് പഠിക്കാൻ തീരുമാനിച്ച റാണി മരിയ യോട് പിതാവ് മോനിച്ചൻ ഒറ്റക്കാര്യമേ പറഞ്ഞുള്ളൂ. "നീ പഠിച്ച് പക്ഷികൾക്കും എക്സോട്ടിക് പെറ്റ്സിനും മികച്ച ചികിത്സ നൽകാൻ കഴിവുള്ള വെറ്ററിനറി ഡോക്ടറായി വാ... അഞ്ചു പതിറ്റാണ്ടിലേറെയായി പക്ഷികളുമായി ചങ്ങാത്തമുള്ള മോനിച്ചൻ നൽകിയ ഉപദേശം മകൾ അക്ഷരം പ്രതി പാലിച്ചു. അതിന്റെ ഫലമാണ് ആധുനിക ചികിത്സാ സംവിധാനങ്ങളെല്ലാമുള്ള ഈ ആശുപത്രി.