ഇപ്പോൾ നടാം ശീതകാല പച്ചക്കറി

കാബേജ്, കോളിഫ്ലവർ, തക്കാളി, കാരറ്റ്, ബീറ്റ്റൂട്ട്, റാഡിഷ് എന്നിവയുടെ കൃഷിരീതികൾ

- അഭിലാഷ് കരിമുളയ്ക്കൽ കൃഷി ഓഫിസർ (റിട്ട.) ഫോൺ: 9447459071

 ശീതകാല പച്ചക്കറികളുടെ കൃഷിക്കു സമയമായി. കാബേജ്, കോളിഫ്ലവർ, കാരറ്റ്, ബീറ്റ്റൂട്ട്, മുള്ളങ്കി(റാഡിഷ്)എന്നിവ ഇപ്പോൾ കൃഷി തുടങ്ങാം. പകൽ കൂടിയ ചൂടും രാത്രിയിൽ മഞ്ഞും തണുപ്പുമൊക്കെയുള്ള കാലാവസ്ഥയിൽ വളരുന്നവയാണ് ശീതകാല പച്ചക്കറികൾ, ശീതകാലത്തു നന്നായി കൃഷി ചെയ്യാൻ പറ്റിയ വിളയാണ് തക്കാളിയും വെളുത്തുള്ളിയും സവാളയും പരീക്ഷണകൃഷിയായി ചെയ്യാം. ഈ മാസം മുതൽ വേനൽ ആരംഭമായ ജനുവരി വരെ കൃഷി ചെയ്ത് വിളവെടുക്കാം. അടുക്കളത്തോട്ടത്തിൽ ഗ്രോബാഗിലോ, ചട്ടിയിലോ മണ്ണിലോ കൃഷി ചെയ്യാം.

ഇനങ്ങൾ: വിത്തുകൾ തൈകൾ തിരഞ്ഞെടുക്കുമ്പോൾ രോഗ, കീട പ്രതിരോധശേഷിയും ഉയർന്ന ഉൽപാദനക്ഷമതയുമുള്ള ഇനമാണെന്ന് ഉറപ്പു വരുത്തണം. തക്കാളിയുടെ വാട്ട രോഗ പ്രതിരോധശേഷിയുള്ള ഇനങ്ങൾ ലഭ്യമാണ്. കോളിഫ്ലവർ ഒരു മൂട്ടിൽ നിന്ന് 2-3 തവണ വിളവെടുക്കാൻ കഴിയുന്ന സ്നോ വൈറ്റ് പോലെയുള്ള ഇനങ്ങൾ കൃഷി ചെയ്യുക. കേരള കാർഷിക സർവകലാശാലാ ഫാമുകൾ, കൃഷിവകുപ്പിന്റെ ഫാമുകൾ, കൃഷിഭവനുകൾ, വിഎഫ്പിസികെ എ ന്നിവിടങ്ങളിൽ നല്ലയിനം വിത്തുകളും തൈകളും ലഭിക്കും. ഒട്ടേറെ സ്വകാര്യ സ്ഥാപനങ്ങളും വിത്ത് വിതരണം ചെയ്യുന്നുണ്ട്. കമ്പനിവിത്തുകൾ ഓൺ ലൈനായും വാങ്ങാം. കമ്പനികളുടെ സൈറ്റുകൾ സന്ദർശിച്ചാൽ ഈ നടീൽ വസ്തുക്കളുടെ സവിശേഷതകൾ അറിയാം. നമ്മുടെ കാലാവസ്ഥയ്ക്കും വിപണിക്കും യോജിച്ചവ തന്നെ വാങ്ങുക.