ഓർമ്മകൾ പെയ്തിറങ്ങിയ നിമിഷം

മല്ലികാ വസന്തം @50

മലയാള സിനിമയിൽ അര നൂറ്റാണ്ട് പൂർത്തിയാക്കുക എന്നത് ചെറിയൊരു കാര്യമല്ല. ഏറെ വെല്ലുവിളികളും പ്രതിസന്ധിയും നിറഞ്ഞ ജീവിതത്തിലൂടെയാണ് ഈ നേട്ടം കൊയ്തത് എന്നു പറയുമ്പോൾ പ്രത്യേകത ഏറെയുണ്ട്. മല്ലികാ സുകുമാരൻ എന്ന അമ്മയുടെ അഭിനയ ജീവിതത്തിനാണ് 50 വർഷം പൂർത്തിയായത്. ഈ അസുലഭ മുഹൂർത്തത്തെ ആഘോഷമാക്കാൻ സുഹൃത് സംഘം തീരുമാനിക്കുകയായിരുന്നു. സുഹൃത്തുക്കളുടെ ആഗ്രഹത്തിന് എതിരും പറഞ്ഞില്ല. അങ്ങനെ തിരുവനന്തപുരം അപ്പോളോ ഡിമോറയിൽ നടന്ന മല്ലികാ വസന്തം 50 എന്ന പരിപാടി ഏറെ വൈകാരികവും ആനന്ദകരവുമായ മുഹൂർത്തങ്ങളാണ് സമ്മാനിച്ചത്. കലാജീവിതവും കുടുംബജീവിതവും സംഗമിച്ച വേദിയിൽ ഓർമകൾ നിറഞ്ഞു.

മന്ത്രിമാരും രാഷ്ട്രീയ സാമൂഹിക സാംസ്കാരിക രംഗത്തെ നിരവധി പ്രമുഖരും മക്കളായ ഇന്ദ്രജിത്ത്," പൃഥ്വിരാജ്, മരുക്കളായ പൂർണിമ ഇന്ദ്രജിത്ത്, സുപ്രിയ മേനോൻ എന്നിവരും ചടങ്ങിൽ പങ്കെടുത്തു. ജീവിതത്തിൽ ഇനി അധിക മോഹങ്ങൾ ഒന്നുമില്ലെന്നും ഇത് വരെ ജഗദീശ്വൻ നൽകിയ വരദാനത്തിന് നന്ദി എന്നുമായിരുന്നു മല്ലികാ സുകുമാരന്റെ വാക്കുകൾ. തിരിഞ്ഞു നിൽക്കുമ്പോൾ ദുർഘടകരമായ അവസ്ഥ മറികടക്കാൻ കൂടെ നിന്ന് സഹോദരങ്ങൾ , മറ്റു കുടുംബാങ്ങൾ മക്കൾ എന്നിവരുടെ പിൻതുണയും, സിനിമാ മേഖലയിലെ സഹായവും മറക്കാനാകാത്തതാണ്. അമ്പതാം വാർഷികം ആഘോഷിക്കുക എന്നത് സുഹൃത് സംഘത്തിന്റെ താൽപര്യമായിരുന്നു . അത് എല്ലാപേരും ഏറ്റെടുത്തതായും എല്ലാവരേയും നന്ദി പൂർവ്വം സ്മരിക്കുന്നതായും മല്ലിക സുകുമാരൻ മറുപടി പ്രസംഗത്തിൽ വ്യക്തമാക്കി.

ചടങ്ങിൽ അച്ഛനെക്കുറിച്ചുള്ള ഓർമകൾ പങ്കുവയ്ക്കുന്നതിനിടെ പൃഥ്വിരാജ് സുകുമാരന്റെ വാക്കുകൾ ഇടറി. അഭിനയ ജീവിതത്തിൽ അൻപതു വർഷം പൂർത്തിയാക്കുന്ന നടി മല്ലിക സുകുമാരനെ ആദരിക്കുന്ന ചടങ്ങിൽ സംസാരിക്കുകയായിരുന്നു പൃഥ്വിരാജ്. അച്ഛൻ മരിച്ച ശേഷം ഭൗതികശരീരവുമായി ആംബുലൻസിൽ പോയ നിമിഷങ്ങൾ പങ്കുവച്ചപ്പോൾ തൊണ്ടയിടറുന്ന പൃഥ്വിരാജിനെ കണ്ട് മല്ലിക സുകുമാരനും ഇന്ദ്രജിത്തും കണ്ണുതുടച്ചു. അമ്മയ്ക്കൊപ്പം അഭിനയിക്കുകയും അമ്മ അഭിനയിച്ച സിനിമ നിർമിക്കുകയും സംവിധാനം ചെയ്യുകയും ചെയ്ത അപൂർവത തനിക്ക് മാത്രം സ്വന്തമാണെന്ന് പൃഥ്വിരാജ് പറഞ്ഞു. അച്ഛൻ മരിച്ചപ്പോൾ, അമ്മ ഇനി എന്ത് ചെയ്യും എന്നോർത്താണ് സങ്കടപ്പെട്ടതെന്നും എന്നാൽ അമ്മ എന്തു ചെയ്തു എന്നതിനുത്തരമാണ് ഇന്നിവിടെ നിൽക്കുന്ന താനും ഇന്ദ്രജിത്തും എന്ന് പൃഥ്വിരാജ് പറഞ്ഞു.