ഒറിജിനൽ വേഷത്തിലുടെ

പോലീസുകാരനാവാൻ ഒരിക്കലും ആഗ്രഹിച്ചിരുന്നില്ല. പോലീസുകാരനായി നടനാകാൻ സ്വപ്ന ത്തിൽ പോലും ചിന്തിച്ചിരുന്നില്ല. സിനിമാനടനായി, ഇത് രണ്ടുമായത് ഒരാൾ തന്നെയാണ് എന്നതാണ് മറ്റൊരു കൗതുകം. അതെ, ശിവദാസ് കണ്ണൂർ പോലീസ് ഉദ്യോഗസ്ഥനാണ്. ചലച്ചിത്ര നടനാണ്. ഇതിനകം നാല് ഷോർട്ട് ഫിലിം ഉൾപ്പെടെ നാൽപത്തിയഞ്ചിൽപ്പരം സിനിമ യിൽ അഭിനയിച്ച ശിവദാസ് കണ്ണൂർ ഫോട്ടോഗ്രാഫിയിലും ചെണ്ടമേളത്തിലും തന്റെ പ്രാവീണ്യം തെളിയിച്ച കലാകാരനാണ്.

- എ.എസ്. ദിനേശ്

ഐ .വി. ശശി സംവിധാനം ചെയ്ത ഇൻസ്പെക്ടർ ബൽറാം എന്ന സിനിമയുടെ ചിത്രീകരണം തലശ്ശേരിയിൽ നടക്കുന്ന സമയം. മമ്മൂട്ടിയുടെ വലിയ ആരാധകനായിരുന്ന മട്ടന്നൂർ കൊടോളിപ്രം സ്വദേശിയും പത്താം ക്ലാസ് വിദ്യാർത്ഥിയുമായ ശിവദാസ് പ്രിയതാരത്തെ കാണാൻ ലൊക്കേഷനിലെത്തി. ഷൂട്ടിംഗ് സ്ഥലത്തെ അവിശ്വസനീയമായ തിരക്ക് കണ്ട് ശിവദാസും കൂട്ടരും അമ്പരന്നു. ഒടുവിൽ മമ്മൂട്ടിയെ കാണാൻ കഴിഞ്ഞില്ലായെന്ന് മാത്രമല്ല, പോലീസുകാരുടെ അടിയും വാങ്ങിയിട്ടാണ് ശിവദാസ് നിരാശയോടെ മടങ്ങിയത്.

കാലം ഏറെ കടന്നുപോയി. ജോഫിൻ ടി. ചാക്കോ സംവിധാനം ചെയ്യുന്ന "ദി പ്രീസ്റ്റ്' എന്ന മമ്മൂട്ടി ചിത്രത്തിന്റെ പൂജാച്ചടങ്ങ് മെഗാസ്റ്റാർ മമ്മൂട്ടി ആദ്യതിരി തെളിയിച്ചു. ഭദ്രദീപത്തിലെ അവസാന തിരി തെളിയിച്ചത് കണ്ണൂർ സ്പെഷ്യൽ ബ്രാഞ്ച് എസ്.ഐ പി. ശിവദാസ്. തിരി തെളിയിക്കാൻ ശിവദാസിനെ ക്ഷണിച്ചത് ചെറുപ്പത്തിലെ തന്നെ ഇഷ്ടതാരമായി മനസ്സിൽ കടന്നുകൂടിയ സാക്ഷാൽ മമ്മൂട്ടി.

മാത്രമല്ല, ആ സിനിമയിൽ ഡി.വൈ.എസ്.പി. ശേഖർ എന്ന കഥാപാത്രമാവാൻ ശിവദാസിനെ നിർദ്ദേശിച്ചതും മഹാനടൻ മമ്മൂട്ടി തന്നെ.