പഠിത്തക്കഥകൾ

കഥക്കൂട്ട്

- തോമസ് ജേക്കബ്

കേരളത്തിൽ ഏറ്റവും കൂടുതൽ സ്കൂളുകളിൽ പഠിച്ചിട്ടുള്ളത് ആരാവും, പ്രഫ.എം. കൃഷ്ണൻ നായരോ അതോ വൈശാഖനോ? അച്ചടക്കമില്ലായ്മ കാരണം എക്സൈസ് വകുപ്പിൽ ഒട്ടേറെ സ്ഥലംമാറ്റം കിട്ടിയ പിതാവിനൊപ്പം പല നാടുകളിൽ താമസിച്ച് പല സ്കൂളുകളിൽ പഠിച്ച കൃഷ്ണൻ നായർ ആ സ്കൂളുകളുടെ പേർ നമുക്കു തന്നിട്ടില്ല. സ്കൂളുകളുടെ എണ്ണം എന്തായാലും മുക്കാൽ ഡസനിൽ കുറയില്ലെന്നാണ് അടുത്തറിയാവുന്നവർ പറയുന്നത്. വൈശാഖൻ പതിനൊന്നു ക്ലാസുകൾ പഠിച്ചത് ഒൻപതു സ്കൂളുകളിലാണ്. ആരോഗ്യ വകുപ്പിലെ ജീവനക്കാരിയായിരുന്ന അമ്മ നാരായണിയമ്മയുടെ സ്ഥലം മാറ്റങ്ങൾക്കനുസരിച്ച് സ്കൂൾ മാറുകയായിരുന്നു.

അമ്മ മുൻകോപിയും മേലധികാരികളുമായി എപ്പോഴും വഴക്കിടുന്ന സ്വഭാവക്കാരിയുമായിരുന്നതിനാൽ പെട്ടെന്നു തന്നെ സ്ഥലംമാറ്റങ്ങളുണ്ടായി എന്ന് വൈശാഖൻ പറയുന്നു. ശിക്ഷാവിധിയായിട്ടായിരുന്നു എല്ലാ സ്ഥലംമാറ്റങ്ങളും.

അരഡസൻ സ്കൂളുകളിൽ പഠിച്ചിട്ടുണ്ട് സാഹിത്യപഞ്ചാനൻ പി.കെ. നാരായണപിള്ള. വൈകി മാത്രം ഔപചാരിക വിദ്യാഭ്യാസം ആരംഭിച്ചതു കാരണം കുറഞ്ഞ വർഷം മാത്രം സ്കൂളിൽ ചെലവഴിച്ച് ചില പ്രഗല്ഭരുണ്ട്.

നമ്പൂതിരിക്കുട്ടികൾ പണ്ടൊക്കെ ഉപനയനത്തിനും സമാവർത്തനത്തിനും ശേഷമേ സ്കൂളിൽ ചേരുകയുള്ളായിരുന്നു. അതുവരെ വീട്ടിൽ ട്യൂഷനുള്ള നമ്പൂതിരിക്കുട്ടികൾ സ്കൂളിൽ ആറാം ക്ലാസിലാണു ചേരുക.