காத்தடிக்குது...

நெல்லை என்ற பெயரைச் சொன்னாலே அல்வாவின் நறுமணம்தான் பலரின் நினைவுக்கு வரும்.

- எம்.முத்துராஜன் இரா.பரமகுமார்

ஆனால், இன்று நெல்லை மாவட்டம் அல்வாவிற்கு மட்டுமல்ல, இந்தியாவின் பசுமை ஆற்றல் புரட்சிக்கும் ஒரு முக்கிய முகவரியாகத் திகழ்கிறது.

காற்றாலைகள் மற்றும் சூரிய ஒளி மின் உற்பத்தி நிலையங்களின் அபரிமிதமான வளர்ச்சியால், இந்த மாவட்டம் தமிழகத்தின் 'பசுமை ஆற்றல் தலைநகரம்' என்ற பெருமையைப் பெற்றுள்ளது.

இந்த வளர்ச்சி, மாநிலத்தின் மின் தேவையைப் பூர்த்தி செய்வதோடு, பல்லாயிரம் கோடிகளில் முதலீடுகளையும், ஆயிரக்கணக்கான வேலைவாய்ப்புகளையும் உருவாக்கி, மாவட்டத்தின் பொருளாதாரத்தையும் மாற்றியமைத்து வருகிறது.

நெல்லை மாவட்டத்தின் பசுமை ஆற்றல் பயணம் என்பது அதன் பரந்து விரிந்த நிலப்பரப்பில் வீசும் பலமான காற்றிலிருந்து தொடங்கியது.

குறிப்பாக, ஆரல்வாய்மொழி கணவாய் பகுதியை ஒட்டியுள்ள நெல்லை மற்றும் கன்னியாகுமரி மாவட்டங்கள், காற்றாலை மின் உற்பத்திக்கு மிகவும் சாதகமான புவியியல் அமைப்பைப் பெற்றுள்ளன. இதன் காரணமாக, 1990களிலேயே இங்கு காற்றாலைகள் நிறுவப்பட்டன.

இன்று, தமிழ்நாட்டின் மொத்த காற்றாலை மின் உற்பத்தித் திறனில் 25%க்கும் அதிகமான பங்களிப்பை நெல்லை மண்டலம் கொண்டுள்ளது. 2010ம் ஆண்டுக் கணக்கீட்டின்படி, சுமார் 2,857 மெகாவாட் மின் உற்பத்தித் திறன் இருந்தது. இந்த எண்ணிக்கை கடந்த பத்தாண்டுகளில் பல மடங்கு அதிகரித்துள்ளது.

கடந்த ஆண்டின் கணக்கெடுப்பின்படி 4,971 மெகாவாட் திறன் கொண்ட 5,235 காற்றாலைகள் உள்ளன. பொதுத்துறை நிறுவனமான என்.எல்.சி இந்தியா லிமிடெட் மட்டுமே நெல்லை கழுநீர்குளம் அருகே 51 மெகாவாட் திறன் கொண்ட காற்றாலைகளை இயக்கி வருகிறது. இந்த வளர்ச்சி, தொழில்நுட்ப ரீதியாகவும் மேம்பட்டுள்ளது.

தமிழகம் சிறப்பிடம்