உலகைத் தாக்கும் சூப்பர் எல் நீனோ... தகிக்கும் தமிழகம்..!

சூப்பர் எல் நினோ... இப்படி தான் உலக வானிலை ஆய்வாளர்கள் இந்த ஆண்டை குறிப்பிடுகின்றனர்.

- பேராச்சி கண்ணன்

இதில் சூப்பர் என்பது தீவிரம் என்பதைக் குறிக்கிறது.

அதாவது இந்த ஆண்டின் இறுதியில் தீவிரமான எல் நினோ நிகழ்வு வரவிருப்பதாகவும், இதனால் உலகெங்கிலும் உள்ள வெப்பநிலை முன்னெப்போதும் இல்லாத வகையில் உச்சநிலைக்குச் செல்லும் எனவும் எச்சரித்துள்ளனர் ஆய்வாளர்கள்.

இந்நிலையில் தமிழகத்தில் இந்த ஆண்டு வெப்பத்தின் தாக்கம் எப்படி இருக்கும் என்பது குறித்து, 'டெல்டா வெதர்மேன்' ஹேமச்சந்தரிடம் பேசினோம்.

“பொதுவாக பசிபிக் பெருங்கடல்ல இருக்கக்கூடிய வெப்ப நிலையின் மாறுபாட்டைக் கணக்கிட்டு அந்த ஆண்டை எல் நினோவா, லா நினாவானு வகைப்படுத்துவாங்க.

அதாவது கிழக்கு மற்றும் மத்திய பசிபிக் பெருங்கடல் பகுதிகளில் இயல்பைவிட கடல் வெப்பநிலை அதிகமாக இருந்ததுனா அது எல் நினோனு சொல்வாங்க.

லா நினா என்பது எல் நினோவுக்கு நேரெதிர். அதாவது கடல் வெப்பநிலை இயல்பைவிட குறைவாக இருப்பது லா நினா.

கடந்த ஆறேழு ஆண்டுகள் எடுத்துக்கிட்டோம்னா, அதில் ஐந்து ஆண்டுகள் லா நினா ஆண்டுகளாகவே இருந்தன. இதனால், சராசரிக்கும் அதிகமான மழைப்பொழிவு இருந்தது.

இதற்கிடையே கடந்த 2023ம் ஆண்டு இறுதியில் ஒரு வலு குறைந்த எல் நினோ வந்தது. அதனால், 2024ம் ஆண்டு வெப்பநிலை அதிகமாக இருந்தது. வெப்ப அலைகளின் தாக்கமும் அதிகமாக காணப்பட்டது.

இப்போ, 2026ல் எல் நினோ உருவாக ஒரு சாதகமான சூழல் காணப்படுது. ஆனா, நாம் இப்போதைக்கு சமநிலையில்தான் இருக்கோம். அதாவது லா நினாவும் இல்ல. எல் நினோவும் இல்ல. நியூட்ரல் ஸ்டேஜ்ல இருக்கோம்.

இந்த ஆண்டு செப்டம்பர், அக்டோபர் மாதம் இந்த எல் நினோ உருவாக இருக்கு. ஆக, இது எல் நினோவை நோக்கி பயணிக்கிற காலம்னு சொல்லலாம்...” என்கிறவர், இதன் தாக்கம் பற்றிக் குறிப்பிட்டார்.

“இந்த முறை உருவாக இருப்பது சூப்பர் எல் நினோ. சூப்பர் எல் நினோ என்பது அதன் தீவிர தன்மையால் வகைப்படுத்தப்படுது. அதாவது 1997, 2015ல் எல்லாம் நமக்கு எல் நினோ வந்தது. அதன் தாக்கம் எல்லாம் ஓரளவுக்கே இருந்தது.

ஆனா, இப்ப உருவாக இருக்கும் எல் நினோ அதிதீவிரம் கொண்டது. அதனால் சூப்பர் எல் நினோனு சொல்றாங்க. 1982க்குப் பிறகு உருவாகிற ஒரு வலுவான சூப்பர் எல் நினோ இது. கிட்டத்தட்ட 50 ஆண்டுகளுக்குப் பிறகு வருது. இதன் தாக்கத்தை இந்த ஆண்டைவிட நாம் அடுத்த ஆண்டுதான் அதிகமாக உணர்வோம்.