புற்றுநோயாளிகள் கட்டணமின்றி தங்கிச் செல்ல ஒரு வீடு ..!

பொதுவாக புற்றுநோயால் பாதிக்கப் பட்டவர்களுக்கு உடல் ரீதியான சிகிச்சை ஒருபக்கம் இருந்தாலும் மனதளவிலான ஆதரவு நிறைய தேவை.

- 

ஏனெனில், நோயின் தாக்கம் குறித்த கவலையும் அதற்கான பல்வேறு சிகிச்சைகளால் ஏற்படும் உடல் வேதனைகளும் அவர்களை மன அழுத்தங்களில் தள்ளிவிடும். அதனால்தான் குடும்பத் தினரும் உறவினர்களும் அவர்களுக்கு உறுதுணையாக இருக்க வேண்டும் என மருத்துவர்கள் வலியுறுத்துகின்றனர்.

அப்படியாக புற்றுநோயாளிகளுக்காக சென்னையில் ஆத்மார்த்தமான ஓர் ஆதரவு கரத்தை நீட்டி அவர்களை ஆசு வாசப்படுத்தி வருகிறது இன்டாஸ் பவுண்டேஷன் என்கிற தன்னார்வ அமைப்பு.

அதாவது அடையாறு புற்று நோய் மருத்துவமனை உள்ளிட்ட மருத்துவமனைகளில் சிகிச்சை எடுக்க சென்னை வரும் வெளியூர் மற்றும் வெளிமாநில நோயாளிகளுக்குக் கட்டணமின்றி தங்கிச் செல்வதற்கு ஓர் இடம் அளிக்கிறது இந்த அமைப்பு.

அதுமட்டுமல்ல. உணவும், போக்குவரத்து வசதியும்கூட கட்டணமின்றி கொடுக்கிறார்கள் என்பதுதான் இதில் இன்னும் சிறப்பு.

இதுதவிர, ஹீமோபிலியா நோய் குறித்து மருத்துவமனைகளுடன் இணைந்து விழிப்புணர்வும், நோயாளிகளுக்கு இலவச பரிசோதனையும் மேற்கொண்டு வருகின்றனர்.

“கடந்த 2021ம் ஆண்டு டிசம்பர் மாதம் இந்த ப்ராஜெக்ட்டை ஆரம்பிச்சோம். அப்போதிலிருந்து தமிழகம் முழுவதும் மற்றும் வெளிமாநிலங்களில் இருந்தும் புற்றுநோயால் பாதிக்கப்பட்டவர்கள் வந்திட்டு இருக்காங்க. இந்த ப்ராஜெக்ட்டில் இப்பவரை 540 பேர் பயனடைஞ்சு இருக்காங்க...” என ஆத்மார்த்தமாகப் பேசுகிறார் இந்த ப்ரா ஜெக்ட்டின் அசோசியேட்டான பரத் சுபாஷ்.

“இன்டாஸ் பார்மா நிறுவனத்தின் சிஎஸ்ஆர் கான்செப்ட்டின் கீழ் இந்த ப்ராஜெக்ட் முன்னெடுக்கப்படுது. இதை எதற்காக ஆரம்பிச்சாங்கனா சென்னை போன்ற பெருநகரங்களுக்கு புற்றுநோய் சிகிச்சைக்காக மற்ற ஊர்களில் இருந்தோ அல்லது மற்ற மாநிலங்களில் இருந்தோ வருகிறவர்கள் வெளியே அறைகள் எடுத்து தங்குறாங்க.

அவங்களுக்கு சிகிச்சைக்கு ஆகும் செலவைவிட தங்கி இருந்து பார்ப்பதற்கு ஆகும் செலவு அதிகமாவதால் பலர் சிகிச்சையைத் தவிர்ப்பது தெரிஞ்சது. இதனால் புற்றுநோயால் இறப்பவர்களின் விகிதம் அதிகமாவது கண்டறியப்பட்டது.

அதனால் இன்டாஸ் பவுண்டேஷன் 2019ல் ஒரு பைலட் ப்ராஜெக்ட்டாக அகமதாபாத்தில் ஒரு ஹோம் ஆரம்பிச்சாங்க. அந்நேரம் கோவிட் வந்தது. அப்ப நிறைய பேர் அந்த ஹோமை பயன்படுத்தினாங்க. அது வெற்றிகரமானதால் இந்தியா முழுவதும் விரிவாக்கினாங்க. அப்படியாக சென்னையிலும் தொடங்கினாங்க.